Пра гэта інфармуе Голас Амэрыкі.
Паводле дадзеных розных агенцтваў, якія ўваходзяць у склад Арганізацыі Аб’яднаных Нацый, мільёны ўкраінцаў пакутуюць ад вострага недахопу ежы, вады, прытулку і іншых прадметаў першай неабходнасьці ў выніку ўварваньня расейскіх войскаў на тэрыторыю краіны.
Гуманітарныя агенцтвы ААН спрабуюць аказваць дапамогу ўкраінцам, якія пацярпелі ад расейскага ўварваньня, аднак разбурэньні, якія прычыняюцца ў выніку авіяўдараў і артылерыйскага агню, а таксама меркаваньні бясьпекі абцяжарваюць дастаўку дапамогі ў некаторыя раёны. У ААН паведамляюць аб немагчымасьці дастаўкі гуманітарнай дапамогі ў Херсон і Марыюпаль, гарады, якія былі разбураныя расейскімі авіяўдарамі.
Выступаючы ў Кіеве, каардынатар ААН у гуманітарных пытаньнях ва Ўкраіне Оснат Лубрані заявіў, што як мінімум 10 тысяч мірных жыхароў былі забітыя і параненыя з пачатку вайны, прычым рэальныя лічбы страт могуць быць значна вышэйшыя. Паводле яго слоў, амаль 16 мільёнаў украінцаў маюць патрэбу ў гуманітарнай дапамозе і абароне.
ГЛЯДЗІЦЕ ТАКСАМА: Сьпікер Нацгвардыі Ўкраіны абверг расейскія паведамленьні аб узяцьці Лісічанску«Мы прыкладаем усе намаганьні, каб падтрымаць людзей, чые жыцьці былі паламаныя праз гэтую вайну, — сказаў Лубрані. — Але Расейская Фэдэрацыя, а таксама ўрад Украіны, павінны рабіць больш, каб абараніць народ гэтай краіны і зрабіць магчымай нашу працу».
Паводле словаў Лубрані, ААН і іншыя міжнародныя арганізацыі аказалі дапамогу амаль 9 мільёнам чалавек ва ўсіх рэгіёнах Украіны. Яна дадала, што амаль 2 мільёны чалавек атрымалі грашовую дапамогу на асноўныя патрэбы.
Украінскі крызіс таксама ўплывае на ўвесь сьвет. Расейскія караблі блякуюць чарнаморскія парты Ўкраіны, не дазваляючы краіне экспартаваць збожжа на Блізкі Ўсход, у Паўночную Афрыку і Азію. Арганізацыя Аб’яднаных Нацый папярэджвае, што гэта можа выклікаць голад у шмат якіх краінах.
Намесьнік каардынатара Сусьветнай харчовай праграмы па надзвычайных сытуацыях Кейт Ньютан кажа, што без адкрыцьця чарнаморскіх партоў немагчыма наблізіцца да неабходнага ўзроўню экспарту ўкраінскага збожжа. Пры гэтым робіцца ўсё магчымае для экспарту з дапамогай аўтамабільнага, чыгуначнага і рачнога транспарту.
Збор ураджаю ва Ўкраіне
Украіна лічыцца адной з сусьветных засек. Яна забясьпечвае каля 10% сусьветнага экспарту пшаніцы і амаль палову сусьветнага экспарту сланечнікавага алею.
Паводле дадзеных Сусьветнай харчовай праграмы (СХП), да вайны Ўкраіна экспартавала да 6 мільёнаў тон збожжа ў месяц. Летась каля 400 мільёнаў чалавек ва ўсім сьвеце ўжывалі ўкраінскую прадукцыю. Паводле дадзеных СХП, цяпер, калі экспарт практычна спыніўся, каля 20 млн тон збожжа затрымаліся на складах ва Ўкраіне.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.