Праз санкцыі супраць Беларусі, а таксама «меры ў адказ» з боку беларускага ўраду з паліц крамаў сталі зьнікаць звыклыя для беларусаў прадукты.
Прадукты і тавары
«Зьнік нямецкі сыр дорблю, гішпанская гародніна і садавіна, замест яе цяпер гародніна і садавіна з Узбэкістану, Расеі, Ірану, Азэрбайджану, яна горшая і часам нават даражэйшая», — пералічвае прадукты, якія раней купляла, мянчанка.
Завозіць шэраг тавараў, у тым ліку садавіну і гародніну, малочку і мяса, з ЭЗ беларускі ўрад забараніў яшчэ ў студзені. 29 чэрвеня стала вядома, што пастанову падоўжылі, але ўвялі некаторыя паслабленьні: дазволілі завозіць абрыкосы, вішні, чарэшні, нэктарыны, сьлівы і хурму.
Яшчэ адна мінчанка кажа, што на некалькі месяцаў прапалі тампоны Tampax.
«Некалькі месяцаў іх не было, даводзілася прасіць знаёмых, каб прывозілі, але вось нядаўна пачалі зьяўляцца», — кажа дзяўчына.
Са зьнікненьнем прадукцыі Roshen паменшаў і асартымэнт цукерак.
«Прапалі цукеркі Roshen, чыпсы Estrella, меншы стаў асартымэнт малака», — паведамляюць чытачы Свабоды.
Таксама з паліц крамаў зьніклі ўкраінскія соўсы «Чумак», украінскія піва і каменная соль. Няма таксама і замарожанай гародніны польскай вытворчасьці — яе замянілі на расейскую. Зьніклі зь беларускіх крамаў польскія карнішоны.
«Зьнікла фарба для валасоў Wella, Londa, корм для катоў «Чатыры лапы», які вырабляецца ва Ўкраіне», — паведамляюць жыхары Менску.
ГЛЯДЗІЦЕ ТАКСАМА: За 5 месяцаў цэны ў Беларусі вырасьлі на 11,8%. Гэта 3-е месца сярод краінаў былога СССРЛекі
Зьнікаюць і некаторыя лекі: адзін зь менчукоў паскардзіўся на адсутнасьць у беларускай сталіцы кропель для вачэй Froxal.
«Параскафэн (абязбольвальнае) адсутнічае ў аптэках Іўеўскага і Лепельскага раёнаў пару месяцаў», — паведамілі жыхары Лідзкага раёну.
Што не зьнікла, але вырасла ў цане
У Беларусі гадавая інфляцыя ў траўні дасягнула 17%, гэта новы рэкорд. Як паказваюць дадзеныя Белстату, найбольш падаражэла гародніна і садавіна. Якраз садавіну і гародніну Беларусь сама сабе забараніла купляць у ЭЗ.
Вось што падаражэла найбольш са студзеня па травень:
- Капуста +35%
- Вінаград +35%
- Яблыкі +34%
- Перцы +32%
- Бананы +25%
- Морква +15%