«Дакладна ёсьць пацярпелыя. Колькасьць удакладняем», — паведаміў Іван Фёдараў празь відэасувязь 30 траўня на брыфінгу ў Кіеве.
Мэр Мелітопаля назваў дзьве магчымыя вэрсіі. Паводле адной зь іх, расейцы праводзяць «зачыстку» сярод калябарантаў, якія не выконваюць сваіх абяцанак.
«Гэта мы ўжо бачылі ў Энэргадары, таму такое можа быць і ў Мелітопалі. І другая вэрсія — мясцовы супраціў, які ёсьць у Мелітопалі. Але дакладную вэрсію мы пачуем ад праваахоўных структур пазьней. Цяпер рашысты праводзяць пільную праверку ўсіх аб’ектаў, якія знаходзяцца побач зь месцам выбуху. Яны ўжо абвясьцілі, што гэта „тэрарыстычны акт украінскіх нацыстаў“», — удакладніў мэр Мелітопаля.
За час акупацыі зь Мелітопаля выехалі 50% жыхароў
Іван Фёдараў таксама паведаміў, што расейцы абвясьцілі пра выдачу расейскіх пашпартоў і SIM-картак для мабільных тэлефонаў, але мясцовыя жыхары не пагаджаюцца іх атрымліваць.
Мэр Мелітопаля дадаў, што ў нядзелю, 29 траўня, у горадзе пад украінскімі дзяржаўнымі сьцягамі адбылася чарговая акцыя пратэсту супраць расейскай акупацыі.
«Я ўпэўнены, што жыхары Мелітопаля падтрымліваюць Украіну і дэмакратычныя каштоўнасьці і чакаюць, калі Ўзброеныя сілы Ўкраіны вызваляць усю краіну», — адзначыў ён.
Паводле яго, у горадзе склалася вельмі складаная гуманітарная сытуацыя — у грамадзян Украіны заканчваюцца наяўныя грошы, а прадукты харчаваньня, якія завозяцца з часова акупаванага Крыму, у 3-4 разы даражэйшыя, чым на кантраляванай тэрыторыі Ўкраіны.
Акцыя пратэсту супраць расейскай акупацыі. Мелітопаль, сакавік 2022
За час акупацыі расейцы выкралі каля 500 актывістаў і заблякавалі магчымасьці выезду зь Мелітопаля ў Запарожжа.
«Апошнія два тыдні эвакуацыя не праводзіцца, таму што расейцы блякуюць гэта на лініі разьмежаваньня, і там на сёньня сабралася ўжо больш за 400 машын, у якіх находзяцца і трохмесячныя дзеці. Сёньня чарга зусім ня рухаецца, бо расейцы выкарыстоўваюць нашых людзей, нашых мірных жыхароў як шчыт, каб гарантаваць сабе бясьпеку ад магчымых абстрэлаў з украінскага боку», — расказаў мэр Мелітопаля.
«Цяпер горад цалкам заблякаваны, зь яго немагчыма выехаць, а за час акупацыі з гораду выехалі 50% жыхароў, амаль 70 тысяч грамадзян пакінулі часова акупаваны Мелітопаль», — паведаміў мэр гораду Іван Фёдараў.
Расейскія войскі ўвайшлі ў Мелітопаль 24 лютага, а 1 сакавіка цалкам яго акупавалі.
Яўген Баліцкі, колішні дэпутат Вярхоўнай Рады Ўкраіны ад Партыі рэгіёнаў, у 2020 годзе абраны дэпутатам Запароскай абласной рады ад «Апазыцыйнага блёку», пасьля акупацыі часткі Запароскай вобласьці, Энэргадара і Мелітопаля ачоліў акупацыйную вайсковую адміністрацыю Запароскай вобласьці. Праваахоўныя органы Ўкраіны завялі крымінальную справу супраць Баліцкага за калябарацыянізм.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.