Украінскія войскі ў контранаступе на Херсоншчыне вызвалілі некалькі вёсак. Расейцы перайшлі ў абарону

Украінскія войскі адкінулі расейцаў на 8 кілямэтраў.

Дарадца міністра ўнутраных спраў Украіны Вадзім Дзенісенка заявіў, што ў выніку контранаступу ўкраінскія войскі вызвалілі некалькі вёсак у Херсонскай вобласьці і адкінулі на 8 кілямэтраў расейцаў.

«Цягам апошніх 2-3 сутак (украінскія войскі) прасунуліся прыкладна на 8 кілямэтраў, гэта калі паглядзець на назвы вызваленых вёсак», — паведаміў Вадзім Дзенісенка ў эфіры ўкраінскага тэлеканалу «Прямий».

У той жа час у Генэральным штабе Ўзброеных сіл Украіны пакуль не паведамляюць аб правядзеньні контранаступу ў Херсонскай вобласьці.

Сьпікер Генштабу Ўкраіны Аляксандар Штупун паведаміў, што ў Мікалаеўскай вобласьці расейцы перакідваюць свае войскі для правядзеньня наступленьня.

«Для папаўненьня страт акупанты перамяшчаюць з тэрыторыі Расеі і часова акупаванага Крыму зьнятую з захаваньня вайсковую тэхніку», — дадаў ён.

ГЛЯДЗІЦЕ ТАКСАМА: У Марыюпалі расейцы звозяць целы забітых жыхароў ва ўнівэрсам; у Севераданецку баі ўжо на вуліцах. 96-ы дзень вайны Расеі супраць Украіны

Экспэрт: украінскія войскі выйдуць на адміністрацыйную мяжу Крыму

Украінскі вайсковы экспэрт Міхайла Самусь пацьвердзіў, што ўкраінскія войскі пачалі контранаступ адразу на двух кірунках — у Херсонскай і Харкаўскай абласьцях.

«Гэта ўсё абумоўлена якраз спрыяльнай сытуацыяй, якая склалася ў выніку таго, што Расея сканцэнтравалася на Данбасе, а Ўкраіна тым часам праводзіць свае апэрацыі для вызваленьня ўкраінскай тэрыторыі. Контранаступальныя і наступальныя апэрацыі не абавязкова павінны праходзіць там, дзе адбываюцца найбольш інтэнсіўныя баі», — патлумачыў экспэрт.

Міхайла Самусь ня мае сумневаў, што ў выніку контранаступу ўкраінскія войскі выйдуць на адміністрацыйную мяжу з Крымам.

Экспэрт паведаміў, што Ўкраіна ўжо атрымала дальнабойную артылерыю.

«Наколькі я разумею, няма пакуль яшчэ ў нашых шэрагах рэактыўных сыстэм залпавага агню, пра якія ўжо даўно гавораць, — гэта M270 MLRS і M142 HIMARS. Мы вельмі моцна іх чакаем, каб пачаць уплываць ужо на глыбіню праціўніка, то бок на абарончыя парадкі ў глыбіні, зьнішчаць сыстэмы кіраваньня, сыстэмы лягістыкі менавіта на глыбіні, напрыклад, 100 кілямэтраў высокадакладнымі ўдарамі», — патлумачыў Міхайла Самусь.

ГЛЯДЗІЦЕ ТАКСАМА: Прэзыдэнт Украіны Зяленскі наведаў Харкаўскую вобласьць

Інстытут вывучэньня вайны: на поўдні расейцы вымушаныя абараняцца

Амэрыканскі Інстытут вывучэньня вайны паведаміў, што ўкраінскія войскі 28 траўня правялі пасьпяховую абмежаваную контратаку ня мяжы Херсонскай і Мікалаеўскай абласьцей і прымусілі расейскія сілы перайсьці ў абарону.

«Гэтая ўкраінская контратака, імаверна, мае на мэце сарваць намаганьні Расеі ўмацавацца на абарончых пазыцыях уздоўж паўднёвага кірунку. Нягледзячы на тое, што ўкраінская контратака ня можа вярнуць значную тэрыторыю ў блізкай пэрспэктыве, яна, хутчэй за ўсё, сарве расейскія апэрацыі і патэнцыйна прымусіць Расею разьмясьціць падмацаваньне ў Херсонскай вобласьці. Украінскія контратакі могуць дадаткова запаволіць намаганьні Расеі па кансалідацыі адміністрацыйнага кантролю над акупаваным поўднем Украіны», — адзначаецца ў справаздачы інстытута.

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.