У 1980-я гады Данчык на словы Сяргея Ясеня (псэўданім Янкі Запрудніка) запісаў папулярную песьню «Каханая».
Багдан Андрусышын згадвае Янку Запрудніка:
«Янка Запруднік быў надзвычайным чалавекам, як кажуць — адзін са „львоў“ беларускай дыяспары ў Амэрыцы. Ягоныя дасягненьні і ўнёсак у галіне сучаснай беларускай гісторыі, безумоўна, бясцэнныя. Кнігі і падручнікі Янкі Запрудніка будуць чытацца дасьледчыкамі будучых пакаленьняў.
Як чалавек Янка Запруднік быў вельмі элегантны і эрудыраваны, паважны (але не занадта), зь ім заўсёды было прыемна і цікава ў кампаніі.
Данчык
З маленства яго памятаю, бо мае бацькі сябравалі з тады маладым Янкам і Вольгай Запруднікамі, а я з братам разам практычна расьлі зь іхнімі дочкамі Нінай і Верай. У дзяцінстве часта адпачывалі разам зь іншымі беларускімі сем’ямі на лецішчы ў горах.
Яшчэ мяне зьвязвае зь Янкам тое, што калі ён адыходзіў на пэнсію ў 1991 годзе — а многія гады ён працаваў шэфам беларускай рэдакцыі Радыё Свабода ў нью-ёрскім офісе — Янка прапанаваў мяне на вызваленую вакансію. Неўзабаве я адляцеў у Мюнхэн, дзе пачаў на Радыё Свабода сваю амаль 30-гадовую кар’еру.
Сёньня беларусы Амэрыкі адчуваюць вялікую страту аднаго з самых яркіх сваіх лідэраў, свайго ўласнага «eminence grise» («шэрага кардынала»).
Найшчырэйшыя спачуваньні спадарыні Надзеі Запруднік, ягонай ня менш актыўнай у беларускім грамадзтве і абаяльнай жонцы, а таксама Ніне і Веры. Вечная памяць».
ГЛЯДЗІЦЕ ТАКСАМА: Памёр патрыярх беларускай дыяспары ў ЗША Янка Запруднік. Этапы жыцьця і выбраныя цытатыНа 96-м годзе жыцьця памёр адзін з найстарэйшых і самых вядомых дзеячоў беларускай дыяспары ў ЗША, гісторык, публіцыст, шматгадовы супрацоўнік Радыё Свабода, сябра Рады БНР Янка Запруднік.
Янка Запруднік (сапраўднае імя Сяргей Вільчыцкі) нарадзіўся 9 жніўня 1926 году ў Міры (у той час — Стаўпецкі павет Наваградзкага ваяводзтва Польскай Рэспублікі, цяпер Карэліцкі раён).
Быў адным зь першых супрацоўнікаў радыё «Вызваленьне» (пазьней — Радыё Свабода) у Мюнхэне, шмат гадоў узначальваў Нью-Ёрскае бюро. Аўтар перадач на тэмы актуальнай палітыкі, беларускай гісторыі, літаратуры і культуры.