Хроніка перасьледу 7 траўня: калёнія за абразу Лукашэнкі ў роліку двухгадовай даўніны, «хатняя хімія» за ўдзел у пратэстах

Мужчыну асудзілі да калёніі за абразу Лукашэнкі ў роліку двухгадовай даўніны

У Речыцы быў абвешчаны прысуд 40-гадоваму Дзянісу Барсукову, паведамляе «Вясна». Яго прызналі вінаватым паводле арт. 368 Крымінальнага кодэкса і асудзілі да двух гадоў пазбаўленьня волі ў калёніі ўзмоцненага рэжыму. Справу разглядаў судзьдзя Станіслаў Іванюценка.

Барсукова асудзілі за абразу Лукашэнкі ў роліку двухгадовай даўніны на ягоным канале Youtube.

Справа разглядалася падчас закрытага пасяджэньня. Вядома, што Барсукоў прызнаў сваю віну і супрацоўнічаў са сьледзтвам. Са слоў Дзяніса, сілавікі абяцалі, што пакараньне ня будзе зьвязана з пазбаўленьнем волі.

Дызайнэрку Vizor Games Галіну Семечку і яе мужа асудзілі за ўдзел у акцыях пратэсту

У Савецкім судзе Менску асудзілі палітзьняволеную дызайнэрку Vizor Games Галіну Семечку і яе мужа Антона Александровіча. Іх абвінавацілі па двух артыкулах Крымінальнага кодэкса: ч. 1 арт. 342 (удзел у дзеяньнях, якія груба парушаюць грамадзкі парадак) і ч. 1. арт. 317-2 (кіраваньне транспартным сродкам асобай, якая не мае права кіраваньня), паведамляе «Вясна».

Судзьдзя Аляксандар Волк асудзіў іх да трох гадоў «хатняй хіміі» кожнага. Галіну вызвалілі ў залі суда. 34-гадовую 2D-мастачку з кампаніі Vizor Games Галіну затрымалі 14 сьнежня 2021 году. У той жа дзень затрымалі яе мужа — 37-гадовага Антона Александровіча, але пазьней яго адпусьцілі і выбралі меру стрыманьня, не зьвязаную з пазбаўленьнем волі.

Барысаўскі актывіст БСДП ня выйшаў на волю пасьля 15 дзён арышту

Барысаўскі актывіст БСДП Ігар Леднік ня выйшаў на волю пасьля 15 сутак адміністрацыйнага арышту, паведамляе Беларуская сацыял-дэмакратычныя партыя (Грамада).

Як паведамлялася раней, на Ігара Ледніка завялі крымінальную справу па ч.2 арт. 367 Крымінальнага кодэксу (за «паклёп на Лукашэнку»). Таксама зьявілася інфармацыя, што яго хутка могуць перавесьці ў Жодзіна і суд над ім можа адбыцца праз два месяцы. Ледніку пагражае да 5 год пазбаўленьня волі.

Напярэдадні адміністрацыйнага арышту ў сацыял-дэмакрата адбыўся вобшук. Была канфіскавана зарэгістраваная партыйная сымболіка, некалькі асобнікаў аналітычнага часопіса БСДП «Пазыцыя», а таксама некалькі кніг.

Ігару Ледніку 60 год. У яго праблемы з сэрцам, мае другую групу інваліднасьці.

Старонку мазырскай палітзьняволенай Крысьціны Чаранковай у Іnstagram прызналі «экстрэмісцкімі матэрыяламі»

Ініцыяваў працэс у судзе ГУБАЗіК.

«Нічога добрага не чакаю», — паведаміла Крысьціна на волю.

Дзяўчыну затрымалі 22 сакавіка 2022 году і прад’явілі абвінавачаньне ў «распальваньні варожасьці ці варажнечы» (арт. 130 Крымінальнага кодэкса).

Вядома, што ў Гомельскім СІЗА № 3 Крысьціну паставілі на ўлік як «схільную да экстрэмізму».