Канцлер Нямеччыны Оляф Шольц сказаў, што краіны NATO і партнэры падчас відэаканфэрэнцыі зь Белым домам прыйшлі да пагадненьня, што яны не павінны дапусьціць перамогі расейскага войска ва Ўкраіне. Кіраўнік ураду Нямеччыны расказаў аб гэтай дамоўленасьці на прэс-канфэрэнцыі аб выніках відэанарады, якая адбылася ў аўторак з удзелам лідэраў заходніх краін, піша Голас Амэрыкі.
Акрамя Шольца, у відэаканфэрэнцыі прынялі ўдзел прэзыдэнты ЗША, Польшчы, Францыі, Румыніі, прэм’ер-міністры Вялікай Брытаніі, Японіі і Італіі, а таксама іншыя афіцыйныя асобы, у тым ліку лідэры Эўрапейскага Зьвязу.
«Разам з нашымі партнэрамі ў ЭЗ і NATO мы абсалютна адзіныя ў думцы, што Расея не павінна выйграць гэтую вайну», — сказаў Шольц.
ГЛЯДЗІЦЕ ТАКСАМА: Шольц і Зяленскі абмеркавалі дадатковыя санкцыі супраць РасеіКанцлер наўпрост зьвярнуўся да прэзыдэнта Расеі Ўладзіміра Пуціна са словамі: «Спыніце абстрэл украінскіх гарадоў. Дазвольце ўвесьці нядоўгае замірэньне і адвядзіце сваіх салдатаў. Спыніце гэтую жудасную вайну».
Шольц назваў дзеяньні РФ ва Ўкраіне «бессэнсоўнай вайной» і «абуральным парушэньнем міжнароднага права».
У заяве, якую распаўсюдзіла канцылярыя брытанскага прэм’ер-міністра Борыса Джонсана па выніках онлайн-сустрэчы, сказана, што «лідэры дамовіліся працаваць разам, каб знайсьці доўгатэрміновае рашэньне ў галіне бясьпекі, каб Украіну нельга было атакаваць зноў такім чынам».
ЗША са свайго боку павялічаць пастаўкі артылерыі Ўкраіне, заявіў прэзыдэнт ЗША Джо Байдэн.
ГЛЯДЗІЦЕ ТАКСАМА: ЗША, Вялікая Брытанія і Канада паставяць Украіне цяжкую артылерыюПадчас віртуальнай сустрэчы Байдэн, у прыватнасьці, выслухаў думкі Борыса Джонсана і прэзыдэнта Францыі Эманюэля Макрона наконт разьвіцьця сытуацыі ва Ўкраіне і гарантыяў бясьпекі афіцыйнаму Кіеву пасьля заканчэньня вайны, улічваючы, што Ўкраіна не ўваходзіць у NATO.
На думку Францыі, гэтыя гарантыі будуць падобныя хутчэй на артыкулы статуту Эўразьвязу аб калектыўнай абароне краін, якія ўваходзяць у яго склад, чым на Пяты артыкул статуту NATO, які аб’яўляе, што атака на адну краіну, якая ўваходзіць у альянс, ёсьць атакай на ўсе краіны блёку.
ГЛЯДЗІЦЕ ТАКСАМА: Бамбаваньні «Азоўсталі», працяг баёў на Данбасе, 5 мільёнаў уцекачоў. 56-ы дзень вайны Расеі супраць УкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.