У Бабруйску асудзілі настаўніцу, якая прыйшла ў школу з жоўтай і блакітнай стужкамі ў валасах

За дзьве стужкі яна мае заплаціць 2240 рублёў штрафу.

У Бабруйску завяршыўся суд над настаўніцай гісторыі 27-й школы Ларысай Секяржыцкай.

4 сакавіка яна прыйшла ў школу з жоўтай і блакітнай стужкамі ў прычосцы. Гэта не спадабалася настаўніцы матэматыкі і кіраўніцы вайскова-патрыятычнай клясы Натальлі Сіманенцы, тая разам з настаўніцай гісторыі Сьвятланай Хутаранскай пачалі гучна запытваць, што Секяржыцкая хацела гэтым сказаць, і патрабавалі, каб яна зьняла гэтыя стужкі. Сіманенка і Хутаранская казалі, што самі маюць родзічаў ва Ўкраіне, але «гэта цяпер не да месца».

«Для мяне гэта асабістая трагедыя, — сказала ў судзе сьведка Хутаранская, — я нарадзілася ва Ўкраіне, вучылася там, мае родныя там. Я мусіла б у гэтай сытуацыі абматацца сьцягам Украіны, але дэманстрацыя якіх-небудзь сьцягоў у дзяржаўнай установе адукацыі, напэўна, непажаданая».

ГЛЯДЗІЦЕ ТАКСАМА: «Атрымалася падобна на беларускі сьцяг і гэта станоўчая рыса». Пагаварылі з аўтаркай расейскага антываеннага сьцяга

Потым да ўгавораў і патрабаваньняў зьняць стужкі далучыліся завуч школы Алена Васількова і дырэктарка Натальля Вінакур. Секяржыцкая адмаўлялася здымаць жаночы аксэсуар, і адміністрацыя выклікала міліцыю, настаўніцу забралі ў ГУУС.

Начальнік аддзелу аховы правапарадку Бабруйскага ГУУС Сяргей Рудзько, які і вёў справу Секяржыцкай, вінаваціў яе ў «актыўным удзеле ў масавым мерапрыемстве ў выглядзе пікетаваньня, што выразілася ў публічным дэманстраваньні жоўта-блакітных стужак у валасах, якія сымбалізавалі сьцяг Украіны».

ГЛЯДЗІЦЕ ТАКСАМА: У Менску міліцыянты затрымалі ўдзельніцу Pussy Riot і прымусілі яе запісаць ролік у падтрымку Лукашэнкі

У якасьці доказу, што гэта палітычная дэманстрацыя, ён прывёў фатаздымкі зь менскіх мітынгаў 27 лютага, дзе былі сьцягі Ўкраіны. Ларыса ж Секяржыцкая нагадала, што на мітынгах не была, наагул у тыя дні хварэла дома на каранавірус, і прадэманстравала суду сьцягі Швэцыі, Босьніі, Барбадаса і іншых краін, а таксама эмблемы ФК БАТЭ і прафсаюзу працаўнікоў адукацыі, якія таксама маюць жоўты і блакітны колеры.

Настаўніца Ларыса Секяржыцкая (у цэнтры са старэйшай дачкой і мужам), якую cудзілі за жоўта-блакітную стужку ў валасах. Бабруйск, 31 сакавіка

Усе сьведкі казалі, што Ларыса Секяржыцкая нічога нікому не казала пра Ўкраіну ці сэнс сваёй прычоскі, асабліва па школе не хадзіла, тыя стужкі нават ня ўсе заўважылі. Затое і Секяржыцкая заявіла, і некаторыя сьведкі пацьвердзілі, што на пэдагагічнай нарадзе 25 сакавіка дырэктарка школы Вінакур на адрас тых настаўнікаў, што прысутнічалі на першым судовым працэсе, сказала: «Думайце, у вас канчаецца кантракт».

ГЛЯДЗІЦЕ ТАКСАМА: «Плошча Перамен і будучыня Беларусі»: вялікі артыкул пра Беларусь у New York Times

Суд цягнуўся 3 дні. Тройчы Ларысе Секяржыцкай не давалі дазволу мець абаронцам свайго мужа, тлумачачы гэта адсутнасьцю ў яго юрыдычнай адукацыі (на адваката сям’я з двума малымі дзецьмі ня мае сродкаў).

У выніку судзьдзя Ганна Асіпенка палічыла актыўны ўдзел у масавым мерапрыемстве даказаным і прысудзіла Ларысе Секяржыцкай штраф 70 базавых — 2240 рублёў. Сям’я Секяржыцкіх будзе абскарджваць прысуд.

ГЛЯДЗІЦЕ ТАКСАМА: «Паміж расейцамі і беларусамі вялізная розьніца». Украінскі маркетоляг расказаў, якую рэакцыю ў Беларусі выклікала антываенная рэкляма

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.