Візыт праходзіць ва ўмовах пагрозы наступу на горад расейскіх войскаў. Кіраўнікі ўрадаў трох краінаў прыбылі ва Ўкраіну на цягніку.
Прэзыдэнт Украіны Ўладзімір Зяленскі назваў мужным крокам візыт кіраўнікоў урадаў Польшчы, Славеніі і Чэхіі ва Ўкраіну ў часе агрэсіі Расеі і сталых абстрэлаў яе войскамі буйнейшых украінскіх гарадоў:
«Гэтыя паважаныя людзі, лідэры сваіх цудоўных незалежных эўрапейскіх дзяржаў, нічога не баяцца. Яны больш баяцца за наш лёс, і яны тут, каб нас падтрымаць. Гэта вялікі мужны крок», — сказаў Уладзімір Зяленскі пасьля сустрэчы з прэм’ер-міністрам Польшчы Матэвушам Маравецкім і польскім віцэ-прэм’ерам Яраславам Качыньскім, а таксама з кіраўнікамі ўрадаў Чэхіі і Славэніі Пэтрам Фіялам і Янэзам Яншам.
Уладзімір Зяленскі падкрэсьліў, што Ўкраіна абсалютна давярае гэтым краінам:
«Таму, калі мы гаворым пра гарантыі бясьпекі, пра нашу будучыню ў Эўрапейскім Зьвязе або пра санкцыйную палітыку, на 100 адсоткаў мы ведаем, што ўсё, што мы абмяркоўваем, сапраўды дасягне мэты, пазытыўнай мэты для нашай краіны, для нашай бясьпекі і для нашай будучыні», — дадаў украінскі прэзыдэнт.
Прэм’ер-міністар Украіны Дзяніс Шмыгаль удакладніў, што асноўнымі тэмамі перамоў стала ўзмацненьні санкцый супраць Расеі і прызнаньне яе краінай –спонсарам тэрарызму, закрыцьцё партоў для расейскіх грузаў, міжнародная дапамога для аднаўленьня інфраструктуры Ўкраіны пасьля вайны, а таксама падтрымка эўраінтэграцыйнага курсу краіны.
«Наш абавязак — быць там, дзе куецца гісторыя. Таму што гаворка ідзе не пра нас, а пра будучыню нашых дзяцей, якія заслугоўваюць магчымасьці жыць у сьвеце, свабодным ад тыраніі», — сказаў польскі прэм'ер Матэвуш Маравецкі. Паводле Пэтра Фіялы, мэта візыту ў тым, каб «пацьвердзіць безумоўную падтрымку сувэрэнітэту і незалежнасьці Ўкраіны з боку ўсяго Эўразьвязу».
Візыт праходзіць у момант, калі афіцыйныя асобы Ўкраіны выказваюць думку, што Масква, магчыма, зьмірыцца з тым, што не змагла сілай накінуць Украіне новае кіраўніцтва.
Прэзыдэнт Украіны Зяленскі заявіў учора , што Кіеў гатовы прыняць гарантыі бясьпекі, якія не адпавядаюць ягонай доўгатэрміновай мэце — сяброўству ў NATO, супраць якога выступае Масква.
ГЛЯДЗІЦЕ ТАКСАМА: Прэм’ер-міністры Чэхіі, Польшчы і Славеніі прыбылі ў аточаны Кіеў для сустрэчы зь ЗяленскімВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.