«У абодвух выпадках яны зьбіраюцца абвінаваціць у гэтым украінскую ўладу. Але яны не разумеюць нават, да чаго гэта прывядзе. Скажам так: не разумее іхнае кіраўніцтва. Тыя людзі, якія вызначаныя як выканаўцы, усё цудоўна разумеюць, і таму, спадзяюся, у іх хопіць розуму гэтага не рабіць. Бо калі ўзьнімецца радыяактыўная хмара, яна пойдзе ня толькі на Ўкраіну, яна пойдзе ў Заходнюю Эўропу, у першую чаргу ў Беларусь, таму што яна побач. І яна пойдзе ў Расею. Ім трэба добра пра гэта памятаць», — сказаў Кірыла Буданаў у інтэрвію праекту Радыё Свабода «Крым.Рэаліі».
Ён дадаў, што гэта будзе «актамі экацыду і міжнароднага тэрарызму і ядзернага шантажу з боку Расеі». Кірыл Буданаў нагадаў, што Расея ўжо абстрэльвала Запароскую АЭС і нанесла ракетны ўдар па Харкаўскім фізыка-тэхнічным інстытуце, на тэрыторыі якога разьмешчаны экспэрымэнтальны ядзерны рэактар. Расейскія войскі захапілі Чарнобыльскую АЭС 24 лютага.
ГЛЯДЗІЦЕ ТАКСАМА: Авіянапады на Мікалаеў і Чарнігаў, аблога Марыюпалю, разбураныя харчовыя склады пад Кіевам. 17-ы дзень вайны Расеі супраць УкраіныУвесь гэты час станцыю абслугоўвае адна зьмена, якая выйшла на працу напярэдадні. Расейцы не дазваляюць правесьці ратацыю пэрсаналу. 9 сакавіка стала вядома аб пашкоджаньні высакавольтнай лініі электраперадач, якая забясьпечвала энэргіяй усе ядзерныя аб’екты Чарнобыльскай АЭС, зоны адчужэньня і гораду Славуціча.
Расейскія войскі адмовілі ў арганізацыі «зялёнага» калідора для рамонтнай брыгады. Урэшце атамнікі вымушаныя былі ўключыць дызэль-генэратары для падтрымкі сыстэм бясьпекі Чарнобыльскай АЭС.
ГЛЯДЗІЦЕ ТАКСАМА: Расейскія вайскоўцы выкралі мэра акупаванага Мелітопаля і крымска-татарскую актывісту. Людзі выйшлі на пратэстАле паліва ў іх хопіць толькі на 48 гадзін. 10 сакавіка Міністэрства энэргетыкі Беларусі паведаміла, што ўвяло напругу на электралінію «Мазыр — Чарнобыльская АЭС», каб забясьпечыць станцыю электрычнасьцю.
У нацыянальнай кампаніі «Укренерго» назвалі гэта правакацыяй і зноў запатрабавалі адкрыць «зялёны» калідор для ўкраінскіх спэцыялістаў.
Адначасова ва Ўкраіне заявілі, што падача электраэнэргіі зь Беларусі немагчымая, бо ўкраінская энэргасыстэма ўжо адключаная ад беларускай і расейскай энэргасыстэм з самага пачатку агрэсіі Расеі.
Раней дзяржаўнае прадпрыемства «Енергоатом» паведаміла, што расейскія войскі, якія займаюць тэрыторыю Запароскай АЭС, замінавалі ўзьбярэжжа Кахоўскага вадасховішча. Акрамя таго, паводле ўкраінскай кампаніі, расейскія вайскоўцы на Запароскай АЭС абмяркоўваюць пляны накіраваць вырабленую ёю электраэнэргію ў Крым і акупаваную частку Данбасу.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.