Сюды ўвайшлі забітыя, параненыя і палонныя расейцы. Войска захопніка пры ўварваньні на 24 лютага налічвала 145 тысяч чалавек наземнай арміі. Пра гэта НВ паведаміў Андрэй Загараднюк, старшыня праўленьня Цэнтру абаронных стратэгій.
Паводле яго, размова ідзе аб 110 тысячах салдат сухапутных войскаў і 35 тысячах паліцэйскіх сілаў (АМАП, СОБР, Расгвардыя).
У цяперашні час групоўка ўзброеных сіл Расеі ва Ўкраіне налічвае да 100 тысяч чалавек (75 тысяч салдат і да 25 тысяч паліцыянтаў і спэцназаўцаў).
«Праз адсутнасьць дастатковай інфармацыі існуюць цяжкасьці з ацэнкай страт праціўніка, якія на 6 сакавіка ацэньваюцца ў 11 тысяч забітымі і 30-35 тысяч параненымі», — сказаў былы міністар абароны Ўкраіны.
ГЛЯДЗІЦЕ ТАКСАМА: Блінкен: Краіны NATO маюць ад ЗША «зялёнае сьвятло» на пастаўкі самалётаў-зьнішчальнікаў ва ЎкраінуАкрамя таго, Загараднюк дадаў, што па дадзеных спадарожнікавай выведкі ЗША на 5 сакавіка супернік увёў у апэрацыю на тэрыторыі Ўкраіны ўжо 90% наяўных сіл, гэта значыць да 110 тысяч чалавек наземных і 36 тысяч паліцэйскіх сілаў.
У дадатак Загараднюк растлумачыў, што, паводле наяўных зьвестак, за межамі Ўкраіны расейскія рэзэрвы жывой сілы складаюць да 15-16 тысяч чалавек. Гэта 10 тыс. салдат і каля 5 тыс. паліцыянтаў.
«Так, гэта вялізная вайсковая машына. Але ўкраінская нацыя здольная ня толькі спыніць яе, але і здаць мэталялом», — падкрэсьліў колішні міністар абароны.
ГЛЯДЗІЦЕ ТАКСАМА: У Расею пайшлі першыя «пахаронкі». Маці палоннага расейскага салдата напісала ЛукашэнкуРэзэрва расейскіх войскаў на мяжы з Украінай складае менш за 9 тысяч чалавек, – Пэнтагон
На тэрыторыю Ўкраіны ўвайшлі каля 95% расейскіх вайскоўцаў, дысьлякаваных паблізу ўкраінскай мяжы ў Расеі і Беларусі, паведамляе ўначы 7 сакавіка выданьне Washington Examiner са спасылкай на актуальны брыфінг амэрыканскага абароннага ведамства.
З прыкладна 170 000 вайскоўцаў, дысьлякаваных уздоўж украінскай мяжы ў Расеі і Беларусі, «прыблізна 95%» цяпер знаходзяцца ў межах краіны, паведаміў журналістам высокапастаўлены прадстаўнік абароны ЗША. Гэта азначае, што ў рэзэрве расейскай групоўкі застаецца менш за 9 тысяч чалавек, якія яшчэ ня ўведзеныя ва Ўкраіну. Яшчэ 4 сакавіка Пэнтагон ацэньваў колькасьць уведзеных Расеяй сілаў у 92 працэнты.
На працягу папярэдніх сутак Пэнтагон «назіраў за абмежаванымі зьменамі на месцах», расейскія войскі «працягваюць намаганьні ў прасоўваньні і ізаляцыі Кіева, Харкава і Чарнігава на поўначы і ўсходзе, сустракаюць моцнае супраціўленьне Ўкраіны».
Расейскія войскі атрымалі посьпех у паўднёвай частцы краіны, часткова дзякуючы наяўнай на акупаваным паўвостраве інфраструктуры, створанай пасьля ўварваньня і анэксіі Крыму ў 2014 годзе. Расейскія войскі ў паўднёвай палове Ўкраіны таксама маюць меншую адлегласьць для папаўненьня сваіх запасаў.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.
ГЛЯДЗІЦЕ ТАКСАМА: Зяленскі паведаміў пра ракетны абстрэл аэрапорту ў ВіньніцыНапад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.