Атачыць Кіеў і здушыць супраціў, – Генштаб Украіны пра намеры Расеі на 9-ы дзень вайны

Генштаб Украіны падсумоўвае: па ўсіх кірунках войскі РФ маюць страты, дэматываваныя расейскія вайскоўцы здаюцца ў палон і кідаюць тэхніку.

Асноўныя намаганьні расейскіх войскаў на сёньняшні дзень засяроджаныя на тым, каб акружыць Кіеў і аслабіць супраціўленьне ў заблякаваных населеных пунктах, паведаміў Генштаб Узброеных сіл Украіны.

ГЛЯДЗІЦЕ ТАКСАМА: Пажар на Запароскай АЭС патушылі, яе пляцоўку захапілі расейцы. Дзявяты дзень вайны Расеі супраць Украіны

«Групоўкі УС РФ вычарпалі асноўную частку апэратыўных рэзэрваў і пачалі падрыхтоўку перакідваньня дадатковых сіл і сродкаў з Паўднёвай і Ўсходняй вайсковых акруг. Другія эшалёны і большая частка апэратыўных рэзэрваў груповак акупантаў уведзены ў апэрацыю», – гаворыцца ў паведамленьні.
У Валынскім кірунку войскі РФ сіламі дзьвюх батальённа-тактычных груп (БТГр) перайшлі да абаронных дзеяньняў у раёнах населеных пунктаў Палескае і Кухары. Ня выключаны ўзброеныя правакацыі на мяжы для ўцягваньня Беларусі ў вайну супраць Украіны;
На Палескім кірунку ваенныя часткі Ўсходняй вайсковай акругі РФ сіламі да пятнаццаці БТГр праводзяць наступальную апэрацыю ў паласе Казаравічы, Вышгарад, Кухары, Фастаў, Абухоў, засяроджваньне намаганьняў на напрамку Бышаў, Украінка.
У барацьбе за межы ў раёне населеных пунктаў Палескае, Кухары, Барадзянка, Бышаў, Гарэнічы, Дзямідаў войскі РФ часткова страцілі наступальны патэнцыял. Асноўныя сілы суперніка блякаваны і спынены ў раёне Макарава, войскі РФ адышлі ад Бучы і аэрадрома Гастомеля;
На Северскім напрамку групоўка войскаў Цэнтральнай вайсковай акругі сіламі да чатырнаццаці БТГр, а таксама 14 вайсковай акругі Паўночнага флёту праводзіць наступальную апэрацыю ў паласе Астэр, Зазім'е; Беразань, Вішанькі, засяроджваючы намаганьні ў кірунках Кіева. Адначасова робіцца перагрупаваньне з мэтай працягнуць наступ у кірунку Бравароў;
На Слабажанскім кірунку групоўка войскаў Заходняй вайсковай акругі сіламі да шаснаццаці БТГр праводзіць наступальную апэрацыю, засяроджваючы намаганьні ў кірунку Навамаскоўску. Блякуе Харкаў з поўначы. Захапіў Балаклею. Войска РФ не атрымала посьпеху ў раёне Ахтыркі і засяродзілі асноўныя сілы ў раёне Гадзяча і Зянькова;
На Данецкім кірунку групоўкі войскаў РФ сіламі 1-га і 2-га армейскіх карпусоў, узмоцненыя сямю БТГр са складу 8-й арміі, працягваюць наступальныя дзеяньні для разьвіцьця тактычнага посьпеху на Новаайдарскім, Валнаваскім і Марыюпальскім напрамках, выйшаў у населены пункт Новааляксандраўка. Маючы значную перавагу ў тэхніцы, атачыў Марыюпаль;
На Луганскім кірунку – баявыя дзеяньні ў напрамку на Старабельск;
На Таўрычным кірунку сіламі да пятнаццаці БТГр войскі РФ засяродзілі намаганьні на напрамку Мікалаеў – Вазьнясенск. Пасьля перагрупаваньня і ўводу часткі апэратыўных рэзэрваў у складзе да БТГр працягваецца наступ у кірунку Запарожжа, часткай сіл – на Марыюпаль.
Адзначаны ўвод у апэрацыю дэсантна-штурмавых падразьдзяленьняў УС РФ у напрамку Мікалаева.

«Акупанты былі спыненыя на Мікалаеўскім кірунку, але мелі частковы посьпех на кірунку Вазьнясенску. Адзначана перамяшчэньне вялікай колькасьці аўтамабільнай тэхнікі з часова акупаванай тэрыторыі Крыму, у якой акупанты ажыцьцяўляюць перавозку злачынцаў зь месцаў выкананьня пакараньняў для арганізацыі беспарадкаў у Мікалаеўскай вобласьці. У Чорным моры марскую групоўку расейскіх акупантаў вывелі з марскіх баз з заданьнем паражаць надводныя сілы групоўкі разнастайных сіл украінскіх УМС. Адначасова супернік працягвае падрыхтоўку да высадкі марскога дэсанту ў раёнах Заліва, Чарнаморску. Прыкрыцьцё груп робіць атрад караблёў агнявой падтрымкі і ракетная катэрная ўдарная група», – гаворыцца ў паведамленьні.

Паведамляецца, што для зьнішчэньня сыстэмы супрацьдэсантнай абароны Ўкраіны на чарнаморскім узьбярэжжы адзначана прыцягненьне бамбавікоў Су-24М і зафіксавана скідваньне касэтных бомбаў РБК-500. Прыкрыцьцё забясьпечвалі зьнішчальнікамі Су-30СМ.

Генштаб падсумоўвае: па ўсіх кірунках войскі РФ маюць страты, дэматываваныя расейскія вайскоўцы здаюцца ў палон і кідаюць тэхніку.

ГЛЯДЗІЦЕ ТАКСАМА: Баі за Запароскую АЭС. Расею заклікаюць спыніць баявыя дзеяньні, якія могуць прывесьці да экалягічнай катастрофы

Напад Расеі на Ўкраіну

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.