Дэталёва аб праграме і яе стварэньні парталу Office Life расказаў кіраўнік стартапу «Мова прафэсіі» Аляксандар Шастаковіч.
Праграма «Мова PRO» прызначаная для смартфонаў на Android і Apple. Яна ўжо ў публічным доступе. Яе можна ўсталяваць і вучыцца правільнаму маўленьню.
«Як працуе? Спампавалі праграму, усталявалі на смартфон, зарэгістраваліся, выбралі патрэбны разьдзел — і можна вучыцца, — тлумачыць Аляксандар. — Заданьні даюцца тэкстам і голасам, выконваць іх трэба голасам, пісаць калі і трэба, то мінімальна. Альбо паўтараеце пэўны выраз, альбо голасам апісваеце тое, што бачыце на выяве. Штучны інтэлект правярае, наколькі ваша маўленьне адпавядае ўзору.
Ёсьць некалькі разьдзелаў прафэсійнай лексыкі — кавярні, запраўкі, IT, кол-цэнтры. Можна вывучыць базавы курс „Асновы“. Усё інтуіцыйна і зразумела. Прайшоўшы тэст, можна атрымаць сэртыфікат — аналяг TOEFL, IELTS, PTE».
ГЛЯДЗІЦЕ ТАКСАМА: «Калі забіраюць сьцяг, мы падымаем мову». Што сказаў Павал Белавус у інтэрвію перад затрыманьнем. ВІДЭА
Для чаго патрэбная праграма
Стартап «Мова прафэсіі» нарадзіўся на грунце сэрвісу say.by, які дапамагае беларусам даведацца, дзе і ў якіх кампаніях можна атрымаць паслугі па-беларуску. За тры гады працы say.by выявілася вялікая патрэба ў сэрвісе хуткага навучаньня беларускай мове.
«Мова ў кампаніі прыходзіць з ініцыятывы „зьнізу“ ці „зьверху“. Ініцыятыва „зьнізу“ звычайна ідзе ад чалавека, які штодня размаўляе па-беларуску. Як ён звольніўся, то і іншыя перастаюць гутарыць па-беларуску, бо няма з кім, няма ўзору, саромеюцца зрабіць памылкі ці проста саромеюцца.
Пры жаданьні кіраўніцтва сыстэмна працаваць зь беларускамоўнымі кліентамі ўзьнікае праблема іншага ўзроўню. Паўстае патрэба навучыць адразу шмат людзей размаўляць па-беларуску. І дзе тады ўзяць столькі носьбітаў мовы, каб навучыць жывой гаворцы і правільнаму вымаўленьню?
Так было, напрыклад, у А-100, кампаніі, якая зрабіла падтрыманьне беларускай мовы штодзённым. Мы стваралі сваю праграму, каб людзі маглі і з уласнай ініцыятывы вывучыць беларускую мову ці ўдасканаліць яе веданьне. Але галоўная мэта — дапамагчы кампаніям навучыць супрацоўнікаў», — кажа кіраўнік стартапу «Мова прафэсіі» Аляксандар Шастаковіч.
Падтрымаць стартап могуць беларускія кампаніі, а таксама неабыякавыя людзі, якія хочуць бачыць яго ня толькі для сваёй прафэсіі, але і для ўсёй краіны ўвогуле.
ГЛЯДЗІЦЕ ТАКСАМА: Як Павал Севярынец прыйшоў да беларускай мовы: «Ведаеш, а вось я ад заўтра пачну размаўляць толькі па-беларуску»Як стваралася праграма
Больш за шэсьць тысяч валянтэраў запісалі каля тысячы гадзін жывога маўленьня праз сайт donar.by. Гэтую базу скарысталі для навучаньня нэўрасетак. Софт створаны з адкрытым кодам commonvoice.mozilla.org. Такая актыўнасьць падняла беларускую мову на высокае месца ў рэйтынгу common voice.
Для захаваньня зьвестак і забесьпячэньня працы залучылі 7 магутных вылічальных сэрвэраў аднаго з найстарэйшых беларускіх правайдэраў гостынгу і воблачных сэрвісаў ActiveCloud.
Да праекту ўжо далучыліся піваварная кампанія «Аліварыя», Jet BI, кавярня «Шпаркі Лось», стаматалягічная лякарня «Глорыя» і некаторыя іншыя.
«Мы рухаемся ў бок вялікага скачка ў пашырэньні жывой беларускай мовы, — тлумачыць Шастаковіч. — Вельмі хацелася б выйсьці на якасна новы ўзровень».
У праекце ўдзельнічае Цэнтар ведаў CLARIN, які дапамагае апрацоўваць беларускія тэксты. Ацэньваць працу будзе Інстытут мовазнаўства імя Якуба Коласа Нацыянальнай акадэміі навук Беларусі.
ГЛЯДЗІЦЕ ТАКСАМА: Mother Language Day = Дзень матчынай мовы. Як беларусы разумеюць гэты выраз? ВІДЭА ГЛЯДЗІЦЕ ТАКСАМА: Праграма для рэлаксацыі і сну KindMind цяпер даступная на беларускай мове, для беларусаў — бясплатна