Актыўныя практычныя дзеяньні ў рамках вучэньняў «Саюзная рашучасьць – 2022» 15 лютага праводзяцца на чатырох палігонах і сама меней дзевяці ўчастках мясцовасьці на тэрыторыі Беларусі, паведаміла прэс-служба Міністэрства абароны.
- На Ружанскім і Обуз-Лясноўскім палігонах (Берасьцейская вобласьць) і Асіповіцкім палігоне (Магілёўская) штурмавая авіяцыя Паветрана-касьмічных сіл Узброеных сіл Расеі «адпрацоўвае пытаньні авіяцыйнай падтрымкі абароненых войскаў з прымяненьнем авіяцыйных сродкаў паражэньня».
- Частка сіл і сродкаў авіяцыйнай групоўкі перабазуюцца на Лідзкі аэрадром (Горадзенская вобласьць).
- На ўчастку мясцовасьці «Палескі» ў Гомельскай вобласьці, недалёка ад мяжы з Украінай, праводзяцца пускі ракет тактычнымі ракетнымі комплексамі «Точка». «Ракетныя падразьдзяленьні Ўзброеных сіл Расеі перамяшчаюцца ў вызначаны раён», — напісалі ў Міністэрстве абароны.
- На Гожаскім палігоне (Горадзенская вобласьць) падразьдзяленьні мэханізаванай брыгады УС Беларусі «адпрацоўваюць пытаньні выхаду на рубяжы блякаваньня і вядзеньня абарончага бою».
- На Берасьцейчскім палігоне падраздзяленьні мотастралковай брыгады з Расеі практыкуюцца ў зьнішчэньні незаконнага ўзброенага фарміраваньня.
- На ўчастку мясцовасьці ў Баранавіцкім раёне падразьдзяленьні мэханізаванай брыгады зь Беларусі і марской пяхоты Расеі «пры падтрымцы авіяцыі вядуць навучальныя баявыя дзеяньні на рубяжах манэўранай абароны».
- На ўчастку мясцовасьці ў Лунінецкім раёне зэнітныя ракетныя падразьдзяленьні Расеі трэніруюцца ў супрацьпаветраным прыкрыцьці войскаў, а таксама нясуць баявое дзяжурства па СПА.
- На ўчастку мясцовасьці ў Гомельскім раёне падразьдзяленьні сіл спэцапэрацый Беларусі практыкуюцца ў ахове аб’ектаў, блякаваньні і зьнішчэньні дыверсійна-разведвальных груп.
- Адзначаецца, што на ўчастках мясцовасьці «Марʼіна Горка» ў Пухавіцкім раёне (Менская вобласьць), Асіповіцкім раёне (Магілёўская), Пінскім раёне (Берасьцейская), Мазырскім і Рэчыцкім раёнах (Гомельская вобласьць) беларускія і расейскія войскі працягваюць выконваць «навучальна-баявыя» задачы ў рамках вучэньняў.
Вучэньні «Саюзная рашучасьць – 2022» праходзяць з 10 па 20 лютага. Зь сярэдзіны студзеня Расея актыўна перакідвала ў Беларусь войска і вайсковую тэхніку.
У ЗША і краінах ЭЗ асьцерагаюцца, што нейкая частка расейскіх войскаў застанецца ў Беларусі. Прадстаўнікі беларускіх і расейскіх уладаў сьцьвярджаюць, што пасьля вучэньняў усе войскі вернуцца ў месцы сталай дыслякацыі.
Дзяржаўны дэпартамэнт ЗША таксама выказаў асьцярогу, што Расія можа выкарыстоўваць войскі, якія разьмяшчаюцца ў Беларусі, для нападу на Ўкраіну з поўначы.
ГЛЯДЗІЦЕ ТАКСАМА: Дзяждэпартамэнт ЗША папярэдзіў Макея пра санкцыі ў выпадку ўдзелу Беларусі ў расейскай агрэсіі супраць УкраіныАфіцыйны прадстаўнік ведамства Нэд Прайс заявіў, што беларускія ўлады папярэджаныя аб наступствах, калі Менск нейкім чынам будзе датычны да расейскай агрэсіі ў дачыненьні да Ўкраіны. Памочнік дзяржсакратара ЗША па справах Эўропы і Эўразіі Карэн Данфрыд паўтарыла папярэджаньне 3 лютага ў тэлефоннай размове з міністрам замежных спраў Беларусі Ўладзімірам Макеем.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.