Пра гэта паведамілі Reuters са спасылкай на прадстаўніка Белага дома і ТАСС са спасылкай на прэс-сакратара Крамля Дзьмітрыя Пяскова.
Званок адбудзецца ў суботу раніцай па амэрыканскім часе (у суботу ўвечары па расейскім). Першапачаткова расейскі бок прапанаваў стэлефанавацца ў панядзелак 14 лютага, Белы дом зрабіў сустрэчную прапанову наконт суботы і яны пагадзіліся.
Што плянуюць абмяркоўваць, пакуль не паведамляецца. Reuters адзначае, што размову анансавалі пасьля таго, як Вашынгтон заявіў, што Расея засяродзіла дастаткова войскаў ля Ўкраіны, каб пачаць буйное ўварваньне. Дзьмітрый Пяскоў падкрэсьліў, што «запыту папярэднічаў пісьмовы зварот амэрыканскага боку».
Пуцін і Байдэн апошні раз размаўлялі па тэлефоне ў канцы 2021 году. Да гэтага, 7 сьнежня, у іх адбыліся перамовы ў рэжыме відэаканфэрэнцыі. Першая вочная сустрэча Пуціна і Байдэна ў якасьці лідэраў дзяржаў прайшла ў Жэневе ў чэрвені 2021 году.
Таксама Дзьмітры Пяскоў паведаміў, што 12 лютага Пуцін паразмаўляе па тэлефоне з прэзыдэнтам Францыі Эманюэлем Макронам.
Блінкен паразмаўляе з Лаўровым
У сваю чаргу дзяржсакратар ЗША Энтані Блінкен 12 лютага паведаміў, што плануе правесці ў суботу тэлефонную размову з міністрам замежных спраў РФ Сяргеем Лаўровым, паведамляе Reuters.
Блінкен заявіў журналістам, што, калі прэзыдэнт Расеі Ўладзімір Пуцін шчыра зацікаўлены ва ўрэгуляваньні эскаляцыі дыпляматычным шляхам, Вашынгтон гатовы адыграць сваю ролю, але ў выпадку ўварваньня Масквы ўвядзе хуткія эканамічныя санкцыі. Ён сказаў, што спытае Лаўрова аб рэакцыі Расеі на прапановы ЗША па ўрэгуляваньні крызісу.
«Пакуль мы бачылі толькі эскаляцыю з Масквы. Гэта ключавы момант: мы гатовыя да ўсяго, што павінна адбыцца», — заявіў Блінкен.
МЗС РФ пацвердзіў запыт Блінкена на тэлефонную размову з Лаўровым.
ГЛЯДЗІЦЕ ТАКСАМА: Белы дом: напад Расеі на Ўкраіну можа пачацца «ў любы час» ГЛЯДЗІЦЕ ТАКСАМА: Шэраг краінаў заклікалі сваіх грамадзян пакінуць Украіну «як найхутчэй» ГЛЯДЗІЦЕ ТАКСАМА: ЗША накіруюць у Польшчу яшчэ 3 тысячы вайскоўцаўПагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.