Зрэшты, абодва бакі выказалі жаданьне прадоўжыць перамоўны працэс.
Амаль дзевяцігадзінныя расейска-ўкраінскія перамовы, якія адбыліся ў чацьвер у сталіцы Нямеччыны, не прывялі да прарыву ў падпісаньні сумеснага дакумэнту, аднак абодва бакі пагадзіліся прадоўжыць перамовы. Агенцтва Reuters паведаміла аб гэтым са спасылкай на кіраўніка адміністрацыі прэзыдэнта Ўкраіны, які прымаў удзел у перамовах у Бэрліне.
Высокапастаўленыя прадстаўнікі ўрадаў Украіны і Расеі сустрэліся ў сталіцы Нямеччыны для ўдзелу ў перагаворах аб спыненьні канфлікту на ўсходзе Ўкраіны.
Андрэй Ярмак, кіраўнік офісу ўкраінскага прэзыдэнта Ўладзіміра Зяленскага, заявіў на брыфінгу, што абодва бакі, пэўна, хутка сустрэнуцца зноў, і выказаў спадзяваньне на прарыў у абмене палоннымі і адкрыцьці блёкпастоў на ўсходзе Ўкраіны.
Расея заявіла, што апошні раўнд перамоваў з Украінай, Францыяй і Нямеччынай наконт вырашэньня канфлікту на ўсходзе Ўкраіны не прывёў да якога-небудзь новага пагадненьня, і раскрытыкавала тое, што яна назвала «адсутнасьцю яснасьці» ў пазыцыі Ўкраіны.
ГЛЯДЗІЦЕ ТАКСАМА: «Беларусь не зьяўляецца сувэрэннай дзяржавай», — чалец Трохбаковай кантактнай групы ў справе ДанбасуПасланьнік расейскага прэзыдэнта Дзьмітрый Козак заявіў пасьля перамоваў у Бэрліне, што ўкраінскае бачаньне будучыні кантраляванага прарасейкімі сэпаратыстамі Данбасу яму «незразумелае».
Расея хоча падзяліць Эўразьвяз
Эўрапейскі зьвяз у чацьвер абвінаваціў Расею ў распальваньні ўкраінскага крызісу і спробе падзяліць чальцоў ЭЗ, адпраўляючы лісты асобным эўрапейскім дзяржавам з просьбай растлумачыць іх пазыцыю ў дачыненьні да прынцыпаў міжнароднай бясьпекі.
Кіраўнік замежнапалітычнага ведамства ЭЗ Жузэп Бурэль заявіў, што адказаў на лісты, накіраваныя міністрам замежных спраў Расеі Сяргеем Лаўровым у некалькі эўрапейскіх краін з просьбай даць сваю інтэрпрэтацыю дактрыны «непадзельнай бясьпекі».
Бурэль сказаў, што адказаў Лаўрову ад імя ўсяго эўрапейскага блёку.
«У ЭЗ агульная замежная палітыка і палітыка бясьпекі, і наша мэта заключаецца ў сумесных дзеяньнях па ўсіх пытаньнях, якія маюць агульны інтарэс, — сказаў ён. — Гэта ўключае ў сябе таксама каардынацыю адказаў на лісты».
ГЛЯДЗІЦЕ ТАКСАМА: «Сытуацыя зь Беларусьсю зьмянілася радыкальна». Шрайбман і Марозаў пра вучэньні «Саюзная рашучасьць — 2022»Бурэль адзначыў, што яго крок атрымаў «аднадушную» падтрымку сярод усіх 27 дзяржаў, якія ўваходзяць у склад ЭЗ.
Лаўроў спэцыяльна папрасіў, каб краіны, да якіх ён зьвяртаўся, адказвалі ад свайго імя, а не ад імя Эўразвязу. Аднак Бурэль у адказ заявіў, што сябры ЭЗ вольныя самі вырашаць, якім чынам яны жадаюць рэагаваць на запыты Масквы.
«Толькі тыя, хто зацікаўлены ў тым, каб падзяліць нас, могуць усумніцца ў такім рашэньні», — заявіў ён.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.