У СБУ заявілі, што расейскія спэцслужбы замовілі ўкраінскіх «цітушак» дзеля правакацыі ў Расеі

«Такія дзеяньні могуць быць выкарыстаны краінай-агрэсарам як яшчэ адна прычына для апраўданьня далейшага ціску на Ўкраіну. Паводле папярэдніх зьвестак, спэцслужбы РФ старанна распрацоўвалі плян правакацый і дывэрсій, накіраваных супраць уласнага насельніцтва. І яны мелі намер абвінаваціць у гэтым нашу дзяржаву. Яны завэрбавалі трох жыхароў Кіеўскай вобласьці, якія паходзяць з крымінальных колаў. Каб выехаць у Расею, яны павінны былі падаць падробленыя дакумэнты. Ім было дадзена заданьне сфармаваць дзьве групы па пяць чалавек у кожнай. Вылет першай плянаваўся ў бліжэйшыя дні», — адзначылі ў прэс-службе СБУ.

Паведамляецца, што зламысьнікі распрацавалі пакрокавую інструкцыю, а ўсю падрабязную інфармацыю яны павінны былі атрымаць на месцы ў Расеі. Паводле СБУ, за ўдзел у правакацыях абяцалі кожнаму па 4 тысячы даляраў.

Куратары запэўнілі «цітушак», што пасьля выкананьня заданьня іх адправяць дадому. Аднак, паводле наяўных зьвестак СБУ, падчас затрыманьня правакатараў плянавалі ліквідаваць. Супрацоўнікі СБУ сьцьвярджаюць, што прадухілілі гэты сцэнар. Арганізатараў і іх саўдзельнікаў затрымалі адначасова ў Кіеве і вобласьці. Гэтыя асобы зьяўляюцца трэнэрамі ў спартыўных клюбах кантактных адзінаборстваў. Яны неаднаразова прыцягваліся прарасейскімі сіламі для ажыцьцяўленьня правакацый і пратэстаў на замову ў розных рэгіёнах Украіны», — адзначылі ў міністэрстве.

Паводле інфармацыі спэцслужбаў, выяўленыя асобы падазраюцца ў арганізацыі актаў вандалізму ў кастрычніку-сьнежні 2021 году над помнікам Сьцяпану Бандэру ў Цярнопалі, над Адэскай сынагогай і замежным прадстаўніцтвам у Адэсе.

Акрамя таго, адзін з затрыманых стварыў так званае «сілавое крыло», у якое ўвайшлі члены спартовых клюбаў і прадстаўнікі крымінальнага асяродзьдзя. Групе была пастаўлена задача ўзяць удзел у аплачаных масавых беспарадках у цэнтры сталіцы ў канцы студзеня 2022 году і справакаваць бойкі. Аднак тады паліцыя спрацавала на апярэджаньне і не дазволіла рэалізаваць такі плян. Па выніках санкцыянаваных ператрусаў канфіскаваная агнястрэльная зброя з патронамі і копіі замежных пашпартоў асобаў, якіх меркавалася накіраваць у Расею для правакацый», — гаворыцца ў паведамленьні СБУ.

Расейскі бок звычайна альбо абвяргае заявы Кіева наконт магчымых завэрбаваных дывэрсантаў ці агентаў, альбо ўвогуле іх не камэнтуе, адзначае ўкраінская служба Радыё Свабода.