Пра гэта паведамляе The Bell са спасылкай на свае крыніцы.
Злучаныя Штаты, Вялікая Брытанія і краіны ЭЗ заяўляюць, што ўвядуць жорсткія санкцыі ў выпадку расейскага збройнага ўварваньня ва Ўкраіну. Канкрэтнага пераліку гэтых санкцый пакуль няма. СМІ са спасылкамі на розныя крыніцы пісалі, што абмяркоўваюцца такія меры, як увядзеньне экспартных абмежаваньняў, санкцыі супраць расейскага сувэрэннага доўгу, найбуйнейшых банкаў, адключэньне Расеі ад банкаўскай сыстэмы SWIFT, індывідуальныя санкцыі супраць буйных прадпрымальнікаў і кіраўнікоў дзяржаўных карпарацый.
Як стала вядома The Bell, на мінулым тыдні першы віцэ-прэм’ер Андрэй Белавусаў правёў сэрыю нарад па гатоўнасьці асобных сэктараў эканомікі да магчымых санкцый. Нарады праводзіліся па выніках стрэс-тэстаў расейскіх кампаній і буйных банкаў. На ўстойлівасьць правяралі як прадпрыемствы рэальнага сэктару эканомікі, у тым ліку Пошту Расеі, «Аэрафлот» і РЖД, так і фінансавыя арганізацыі, — сьцьвярджаюць крыніцы выданьня.
ГЛЯДЗІЦЕ ТАКСАМА: У Расеі генэрал-палкоўнік выступіў супраць вайны з Украінай і заклікаў Пуціна падаць у адстаўкуУ прыватнасьці, падчас стрэс-тэстаў мадэлявалі адключэньне Расеі ад SWIFT, забарону на пастаўку заходняга праграмнага абсталяваньня, сэрвэраў, чыпаў і іншага высокатэхналягічнага абсталяваньня. «Справаздачацца ўсе бадзёра, але ў прыватных размовах кажуць — катастрофа», — сказаў пра вынікі «вучэньняў» адзін з суразмоўцаў The Bell. Афіцыйна ў апараце ўраду правядзеньне стрэс-тэстаў не камэнтавалі.
Раней паведамлялася, што свае тэхналягічныя вучэньні правёў «Сбербанк». На іх, у прыватнасьці, мадэлявалася сытуацыя адключэньня IT-інфраструктуры банку ад падтрымкі Microsoft і іншых кампаній.
ГЛЯДЗІЦЕ ТАКСАМА: Дарадца прэзыдэнта ЗША: Уварваньне Расеі ва Ўкраіну — толькі адзін з варыянтаў разьвіцьця канфліктуАмэрыканскія афіцыйныя асобы, уключна з прэзыдэнтам ЗША Джо Байдэнам, раней заяўлялі, што Захад увядзе супраць Расеі беспрэцэдэнтныя, «нябачаныя» і «траўматычныя» санкцыі ў выпадку ўварваньня ва Ўкраіну. Пры гэтым пра канкрэтныя парамэтры ўсё яшчэ працягваюцца дыскусіі. Сярод спрэчных момантаў, напрыклад, — адключэньне Расеі ад SWIFT ці забарона на пастаўку амэрыканскай вылічальнай і нават бытавой тэхнікі, у тым ліку смартфонаў.
Расея адмаўляе пляны ўварваньня ва Ўкраіну, аднак ЗША апошнім часам заяўляюць, што напад магчымы фактычна ў любы момант — расейская ўзброеная групоўка каля межаў, як паведамляецца, расьце з кожным днём.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.