У судзе Жлобінскага раёну разгледзелі справу супраць семярых абвінавачаных у незаконным абарачэньні наркотыкаў, паведамляе прэс-служба Гомельскага абласнога суду.
Усе падсудныя непаўналетнія: два хлопцы і пяць дзяўчат, іх узрост не называецца. Падрабязнасьцяў у справе практычна няма, паседжаньні праходзілі ў закрытым фармаце.
Дваіх падлеткаў прызналі вінаватымі паводле ч. 4 арт. 328, ч. 1 арт. 14 і ч. 4 арт. 328 Крымінальнага кодэксу Беларусі — у незаконным набыцьці і збыце псыхатропных рэчываў (у т. л. на тэрыторыі ўстановы адукацыі, заведама непаўналетнім), учыненым групай асобаў у буйным памеры і прысудзілі ім па 11 гадоў пазбаўленьня волі з адбываньнем пакараньня ў выхаваўчай калёніі.
Дзяўчаты ўсе атрымалі па 6 гадоў пазбаўленьня волі з адбываньнем у выхаваўчай калёніі. Траіх зь іх прызналі вінаватымі паводле ч. 1 арт. 14 ч. 3 арт. 328 КК, адну яшчэ і паводле ч.1 арт. 328 КК, і дзьвюх — паводле ч. 3 арт. 328 КК.
Акрамя таго, як паведамляе прэс-служба суду, з хлопцаў вырашана спагнаць суму «неабгрунтаванага ўзбагачэньня» ў памеры 4002 рублі, з адной зь дзяўчат — 60 рублёў.
Прысуд пакуль не набыў законнай сілы і можа быць абскарджаны.
ГЛЯДЗІЦЕ ТАКСАМА: У Менску за незаконнае абарачэньне наркотыкаў асудзілі 13 чалавек, малодшаму — 16 гадоў ГЛЯДЗІЦЕ ТАКСАМА: «Выжыць у калёніі». Гісторыя юнай магіляўчанкі, асуджанай за наркотыкі ГЛЯДЗІЦЕ ТАКСАМА: Жорсткае пакараньне не ратуе ад наркотыкаў. Тлумачыць галоўны навуковец эўрапейскага цэнтру наркаманіторынгу