EUobserver інфармуе, што забудоўнік патрабуе выдаліць артыкул пра кампаніі, якія могуць быць зьвязаныя з Аляксандрам Лукашэнкам і атрымліваць ад гэтага прэфэрэнцыі.
«У лістападзе кампанія ініцыявала справу ў судзе першай інстанцыі Брусэля, сьцьвярджаючы, што тая гісторыя нанесла шкоду гонару рыэлтарскай кампаніі, стварыўшы ілжывае ўражаньне, што яна атрымала льготы дзякуючы сувязям зь Ліліяй Лукашэнкай, нявесткай кіраўніка Беларусі.
ГЛЯДЗІЦЕ ТАКСАМА: «Гэта выглядае вельмі маштабна». Як новыя санкцыі паўплываюць на беларускую эканомікуАднак усе факты ў нашым артыкуле пацьверджаныя афіцыйнымі дакумэнтамі. „Дана Астра“ нават не адмаўляе гэтыя факты. Проста спрабуюць перашкодзіць нам займацца журналістыкай. Гэтага ня будзе», — адрэагаваў на пазоў галоўны рэдактар EUobserver Керт Дэбэф.
EUobserver нагадвае, што сёлета ў красавіку, апынуўшыся ў санкцыйным сьпісе, «Дана Астра» падала пазоў да Рады Эўразьвязу. Кампанія мела пытаньні да высновы, што яна «здабывае выгаду ад рэжыму Лукашэнкі ці падтрымлівае яго».
ГЛЯДЗІЦЕ ТАКСАМА: EUobserver: Эўразьвяз можа пашырыць санкцыі на бізнэсоўцаў, зьвязаных з ЛукашэнкамУ сьнежні 2020 году Эўразьвяз увёў санкцыі супраць шэрагу фізычных і юрыдычных асобаў Беларусі, у лік якіх трапіў найбуйнейшы забудоўнік Менску з сэрбскімі каранямі.
Паводле публікацыі ў EUobserver, «Дана Холдынгз / Дана Астра» непразрыста атрымала зямельныя надзелы пад забудову буйных жылых комплексаў і бізнэс-цэнтраў, а Лілія Лукашэнка займае ў кампаніі высокую пасаду. Адпаведна, фірма атрымлівае выгаду ад рэжыму і, такім чынам, падтрымлівае яго.
ГЛЯДЗІЦЕ ТАКСАМА: Алексін, Гуцэрыеў, Зайцаў, Цяцерын. Што за набліжаныя да Лукашэнкі бізнэсоўцы падпалі пад санкцыіСанкцыйныя абмежаваньні ўключаюць замарозку рахункаў, а таксама забарону рэзыдэнтам Эўразьвязу непасрэдна або апасродкавана даваць фігурантам «чорнага сьпісу» доступ да фінансавых сродкаў і супрацоўнічаць зь імі.
Санкцыі Эўразьвязу супраць рэжыму Лукашэнкі
Эканамічныя сэктаральныя санкцыі
Эканамічныя сэктаральныя санкцыі былі ўведзеныя Эўразьвязам пасьля інцыдэнту з прымусовай пасадкай самалёта Ryanair у Менску 23 траўня 2021 году і наступнага затрыманьня журналіста Рамана Пратасевіча і ягонай партнэркі Соф'і Сапегі, а таксама з прычыны парушэньняў правоў чалавека і рэпрэсій.
У матывацыйнай частцы прынятага рашэньня прыгадваюцца, у прыватнасьці, эскаляцыя сур’ёзных парушэньняў правоў чалавека ў Беларусі і жорсткія рэпрэсіі супраць грамадзянскай супольнасьці, дэмакратычнай апазыцыі і журналістаў, а таксама асобаў, якія належаць да нацыянальных меншасьцяў.
24 чэрвеня 2021 году Эўразьвяз увёў наступныя абмежавальныя захады:
- У экспарце і перадачы абсталяваньня, тэхналёгіяў або праграмнага забесьпячэньня, прызначанага для выкарыстаньня ў інтарэсах беларускіх уладаў у маніторынгу або перахопе Інтэрнэту і тэлефоннай сувязі на мабільных або стацыянарных прыладах.
- У экспарце ў Беларусь тавараў падвойнага прызначэньня для вайсковага выкарыстаньня.
- У экспарце ў Беларусь тавараў, якія выкарыстоўваюцца для тытунёвых вырабаў.
- У імпарце ў ЭЗ нафтапрадуктаў з Беларусі.
- У імпарце ў ЭЗ калійных угнаеньняў з Беларусі,
- У доступе на фінансавыя рынкі ЭЗ ўраду Беларусі, а таксама беларускім дзяржаўным фінансавым інстытутам і субʼектам.
- Эўрапейскаму інвэстыцыйнаму банку забаронена фінансаваць праекты ў дзяржаўным сэктары Беларусі.
Санкцыі супраць асобаў і прадпрыемстваў
Раней, на пасяджэньні ў Люксэмбургу 21 чэрвеня 2021 году, міністры замежных спраў Эўразьвязу зацьвердзілі чацьвёрты пасьля прэзыдэнцкіх выбараў 2020 году ў Беларусі пакет санкцый супраць беларускага рэжыму.
Санкцыйны сьпіс з 78 чалавек і 8 арганізацый, якім замарожваюцца актывы і забараняецца выдача візаў у Эўразьвяз, быў апублікаваны ў афіцыйным часопісе Эўразьвязу, такім чынам ён набывае моц.
Яшчэ раней, у кастрычніку, лістападзе і сьнежні 2020 году Эўразьвяз увёў тры пакеты санкцый супраць уладаў Беларусі. Абмежавальныя захады тычацца афіцыйных асобаў, а таксама некаторых прадпрыемстваў. Агулам у санкцыйным сьпісе тады апынуліся 84 асобы, якім забаронены ўезд у краіны ЭЗ. У сьпіс уваходзіць Аляксандар Лукашэнка, ягоны сын Віктар Лукашэнка, кіраўніца ЦВК Лідзія Ярмошына, старшыня КДБ Іван Тэртэль, старшыня Сьледчага камітэту Іван Наскевіч, генэральны пракурор Андрэй Швед і іншыя сілавікі, а таксама судзьдзі і чальцы выбарчых камісіяў.
Сярод іншага, ЭЗ увёў санкцыі супраць юрыдычных асобаў: ЗАТ «Белтэхэкспарт», «Дана Холдынгз/Дана Астра», Кіраўніцтва справаў прэзыдэнта Беларусі, ТАА «Сінэзіс», ААТ «АГАТ — электрамэханічны завод», ААТ «140-ы рамонтны завод» і ААТ «Менскі завод колавых цягачоў».