Стала вядома, чаму Сьледчы камітэт адмовіў палітзьняволенай Залатар у завядзеньні справы на ГУБАЗіК за катаваньні

З такой фармулёўкай Сьледчы камітэт Беларусі адмовіў палітзьняволенай ў завядзеньні крымінальнай справы на супрацоўнікаў ГУБАЗіК, паведамляе «Вясна».

Працэс над шматдзетнай маці Вольгай Залатар, якая ўжо 8 месяцаў знаходзіцца за кратамі, пачаўся ў гарадзкім судзе Менску раніцай 15 лістапада.

Вольгу Залатар абвінавачваюць у стварэньні экстрэмісцкага фармаваньня, арганізацыі і навучаньні дзеяньням, якія груба парушаюць грамадзкі парадак, а таксама ў пасобніцтве. Паводле выстаўленых ёй чатырох артыкулаў КК Залатар пагражае да 7 гадоў пазбаўленьня волі. Справу Вольгі Залатар разглядае судзьдзя Анастасія Папко. Бок дзяржаўнага абвінавачаньня падтрымлівае пракурорка Жанна Баранава.

Паводле дзяржаўнай абвінаваўцы, увосень 2020 году Вольга Залатар некалькі разоў асабіста брала ўдзел у акцыях пратэсту ў Менску, а таксама была актыўнай арганізатаркай акцый у Ждановічах, дзе стала жыве з мужам і дзецьмі. Пры гэтым, па словах пракуроркі Баранавай, Вольга Залатар арганізоўвала акцыі з дапамогай нявызначанай тэхнікі і з удзелам нявызначаных асобаў. Паводле вэрсіі абвінавачваньня, Залатар таксама зьбірала неабходныя для арганізацыі пратэстаў грошы і арганізавала дапамогу затрыманым удзельнікам акцый пратэсту.

Вольга Залатар не прызнала сваёй віны ні па адным з артыкулаў абвінавачаньня.

Як раней паведаміў адвакат Вольгі Андрэй Мачалаў, падчас допытаў Вольга заявіла, што ў дзень затрыманьня 18 сакавіка да яе ўжывалася фізычная сіла. Адвакаты выявілі ў жанчыны сінякі на руках, шыі і ягадзіцах.
З матэрыялаў справы, агучаных на судзе, стала вядома, што экспэрты аглядалі Вольгу ў ізалятары толькі 6 красавіка — больш чым праз два тыдні пасьля затрыманьня, паведамляе Праваабарончы цэнтар «Вясна».

У заключэньні пазначана, што пры аглядзе экспэртам у Залатар цялесных пашкоджаньняў ня выяўлена. Згодна з прад'яўленым мэдыцынскім дакумэнтам у Залатар былі сінякі сіняга колеру на левай і правай ягадзіцы, якія маглі ўтварыцца ад траўматычных уздзеяньняў і тупога прадмета.

Раней Залатар і яе абаронца Мачалаў падавалі заяву на завядзеньне крымінальнай справы ў дачыненьні да старшага опэрупаўнаважанага супрацоўніка ГУБАЗіКа Тверацінава па факце перавышэньня і злоўжываньня ўлады або службовых паўнамоцтваў (артыкулы 424 і 426 Крымінальнага кодэкса) у сувязі з ужываньнем фізычнай сілы да Вольгі.

Як вынікае з матэрыялаў справы, адвакат Андрэй Мачалаў пасьля затрыманьня запатрабаваў кнігу аб ужываньні фізычнай сілы і спэцыяльных сродкаў у дачыненьні да затрыманых, аднак па запісах у ёй 18 сакавіка да Залатар не ўжывалася фізычная сіла.

20 красавіка ў завядзеньні крымінальнай справы аб перавышэньні службовых паўнамоцтваў супрацоўнікам ГУБАЗіКа было адмоўлена на падставе адсутнасьці ў яго дзеяньнях складу злачынства. Сьледчы камітэт вырашыў, што «заявы Залатар аб прычыненьні ёй цялесных пашкоджаньняў не адпавядаюць рэчаіснасьці, паколькі яны мелі месца да яе затрыманьня».

Маці пяцярых дзяцей Вольгу Залатар затрымалі ў пасёлку Ждановічы ў канцы сакавіка. У той жа дзень дома ў Вольгі прайшоў ператрус, яе мужа арыштавалі на 10 сутак. Саму жанчыну перавялі ў СІЗА-1 Менску і празь некалькі дзён абвінавацілі ў арганізацыі і навучаньні дзеяньням, скіраваным на прычыненьне шкоды нацыянальным інтарэсам Рэспублікі Беларусь.