Здарэньні

Стала вядома пра новыя затрыманьні гомельскіх айцішнікаў за падпіску на «экстрэмісцкія» каналы

Беларускія айцішнікі, ілюстрацыйнае фота

Ад сярэдзіны кастрычніка сілавікі затрымалі блізу дзясятка супрацоўнікаў ІТ-сфэры, пераважна гэта праграмісты гомельскага офісу кампаніі ЕРАМ і некаторых стартапаў. Усіх абвінавачваюць ў падпісцы на каналы і чаты, прызнаныя «экстрэмісцкімі».

29 кастрычніка рэдакцыя сайту dev.by атрымала ананімны ліст з ProtonMail. Там сьцьвярджаецца, што перасьлед не спыніўся — прыходзілі і да іншых гомельскіх айцішнікаў.

ГЛЯДЗІЦЕ ТАКСАМА: Праваабаронцы паведамілі пра хвалю затрыманьняў за падпіску на «экстрэмісцкія» тэлеграм-каналы

Аўтар зьвярнуў увагу на затрыманьне Мікіты Гарулі, QA-інжынэра з гомельскага офіса iTechArt. Відэа зь ягоным удзелам зьявілася ў тэлеграм-канале «Людмила Гладкая. СБ. Беларусь сегодня».

На кадрах малады чалавек кажа, што «ўдзельнічаў у дэструктыўных чатах», а таксама меў зносіны са сваім аднаклясьнікам, датычным да «анархічнага руху». Сёлета ў сакавіку Мікіта Гаруля быў сьпікерам канфэрэнцыі Open IT Gomel.

ГЛЯДЗІЦЕ ТАКСАМА: Рэктарат унівэрсытэту ў Гомлі будзе назіраць за студэнтамі і выкладчыкамі

У ананімным допісе таксама гаворыцца, што ў Гомлі затрымалі айцішніка з MBicycle, фрылансэра і яшчэ пару хлопцаў. Паводле зьвестак крыніцы, «пакаяльныя» відэа ўжо зьнятыя, але пакуль не апублікаваныя.