COVID-19

За два тыдні ў Менску памерлі тры цяжарныя з COVID-19. Немаўлят удалося выратаваць

Радзільня, ілюстрацыйнае фота

Жанчыны ўзростам 27-30 гадоў ляжалі ў рэанімацыі адной менскай радзільні, ва ўсіх вельмі цяжка працякала хвароба.

Інфармацыю аб трох памерлых парадзіхах Zerkalo.io пацьвердзілі адразу некалькі мэдыкаў. Дзяцей, сьцьвярджаюць яны, выратавалі.

ГЛЯДЗІЦЕ ТАКСАМА: Галоўны санітарны лекар: Кітайскую вакцыну накіроўваем для цяжарных, магчымыя паступленьні і іншых вакцын

Знаёмая адной з жанчын расказала, што яе цяжарная сяброўка трапіла ў лякарню ў пачатку кастрычніка. У яе быў каранавірус.

«Празь некалькі дзён стала значна горш. Яе паклалі на ШВЛ, але выратаваць ужо не змаглі. Зрабілі кесарава. Дзяўчынка нарадзілася маленькая, але здаровая», — расказала сяброўка памерлай.

Раней Свабода расказвала пра сьмерць цяжарнай жанчыны ў Гомлі.

ГЛЯДЗІЦЕ ТАКСАМА: «Даслала нам фота ў масцы і напісала: „Апошні дзень“». Блізкія расказалі пра абставіны сьмерці хворай на COVID-19 цяжарнай жанчыны

Журналісты зьвярнуліся ў прэс-службу Міністэрства аховы здароўя з просьбай удакладніць, ці паступала ім інфармацыя аб сьмерці цяжарных жанчын з COVID-19, але адказу пакуль не атрымалі.

Паводле зьвестак РНПЦ «Маці і дзіця», за мінулы год у Беларусі не зарэгістравана выпадкаў мацярынскай сьмяротнасьці.