У Беларусі, паводле афіцыйных зьвестак, на 11 верасьня захварэлі 501 166 чалавек, адужалі — 491 410, памерлі — 3905.
На думку незалежных экспэртаў, афіцыйная статыстыка ў Беларусі, асабліва што да колькасьці сьмяротных выпадкаў, істотна заніжаная ў параўнаньні з рэальнай сытуацыяй.
Адным сказам
- Беларускія мэдыкі чакаюць уздыму захворваньня на каранавірус, пра гэта заявіла першая намесьніца міністра аховы здароўя Алена Богдан.
- У кіраўніцтве ЭЗ заявілі аб дасягненьні пастаўленай раней мэты цалкам вакцынаваць ад каранавіруснай інфэкцыі COVID-19 да канца лета 70% дарослага насельніцтва.
- Улады Даніі адмянілі зь пятніцы, 10 верасьня, усе абмежаваньні, уведзеныя імі ў сувязі з каранавірусам, паколькі там прышчапіліся 83% і цяпер COVID-19 ня лічыцца ў гэтай краіне «захворваньнем, крытычным для грамадзтва».
- Славаччына спыніла прышчэпкі расейскай вакцынай «Спутник V».
- Эўрапейскае агенцтва па лекавых сродках ня можа назваць дату ўхвалы ў ЭЗ расейскай вакцыны ад каранавірусу «Спутник V» і кітайскага прэпарата Sinovac.
- Паўднёваафрыканскія навукоўцы выявілі новы варыянт каранавірусу са шматлікімі мутацыямі, але пакуль ня высьветлілі, ці ён здольны пераадолець імунітэт, які забясьпечваюць для арганізму вакцыны або перанесеная хвароба.
Першая краіна ў сьвеце пачала вакцынацыю дзяцей ад двух гадоў
Вакцына Soberana-02
Куба стала першай у сьвеце краінай, якая распачала вакцынацыю дзяцей ад двух гадоў. Для прышчэпак выкарыстоўваюцца мясцовыя прэпараты Abdala і Soberana. Сусьветная арганізацыя аховы здароўя іх пакуль не прызнала.
Праз пандэмію на Кубе школы практычна не адкрываліся з сакавіка 2020 году. Новы навучальны год пачаўся ў краіне 6 верасьня. Выкладаньне вядзецца праз тэлебачаньне, бо ў большасьці сем’яў няма доступу ў інтэрнэт.
Кубінскія ўлады чакаюць, што школы будуць адчыняцца пакрокава з кастрычніка, калі да гэтага часу ўсе дзеці і падлеткі будуць вакцынаваныя.
Куба ня стала ані закупляць імпартныя вакцыны, ані ўдзельнічаць у праграме дапамогі COVAX, у рамках якой бедныя краіны могуць атрымаць прэпараты для барацьбы з каранавірусам. Вакцына Abdala, паводле дадзеных кубінскіх распрацоўшчыкаў, пры выпрабаваньнях паказала эфэктыўнасьць больш за 92 адсоткі, прэпарат Soberana — 62 адсоткі.
У апошнія месяцы на Кубе назіраецца ўсплёск захворваньня на каранавірус. З 5700 сьмерцяў ад COVID-19 прыкладна палова здарылася ў мінулым жніўні. Ад пачатку пандэміі ў краіне выяўлена больш за 650 тысяч выпадкаў заражэньня каранавірусам, зь іх 95 тысяч прыпадае на дзяцей і падлеткаў.
У большасьці краін сьвету вакцынацыя ўхваленая для дзяцей з 12 гадоў. Раней аб плянах рабіць прышчэпкі ад COVID-19 малым дзецям паведамлялі Кітай, Аб’яднаныя Арабскія Эміраты і Вэнэсуэла. У Чылі 6 верасьня кітайскі прэпарат Sinovac ухвалілі для вакцынацыі дзяцей ад шасьці гадоў.