Як паведамляецца ў адмысловай заяве Рады ЭЗ, падтрымаюць Альбанію, Паўночную Македонію, Сэрбію, Чарнагорыю і Турэччыну.
«Гэтая падтрымка дапаможа бэнэфіцыярам правесьці рэформы з мэтай будучага сяброўства ў Зьвязе, — гаворыцца ў заяве. — Бэніфіцыярам будзе аказаная падтрымка ў правядзеньні неабходных палітычных, інстытуцыйных, прававых, адміністрацыйных, сацыяльных і эканамічных рэформаў, каб адпавядаць каштоўнасьцям Зьвязу і паступова прыстасоўвацца да правілаў, стандартаў, палітыкі і практыкі Зьвязу».
Заўважна, што тэрміны далучэньня да ЭЗ вышэйназваных краінаў не акрэсьленыя. Назіральнікі адзначаюць таксама адсутнасьць у сьпісе Ўкраіны.
Тым часам Эўрапейскі парлямэнт выказаў падтрымку эўрапейскім памкненьням Украіны і заявіў, што тэрміны ўступленьня ў ЭЗ залежаць ад самой Украіны, піша «Эўрапейская праўда».
Пра гэта гаворыцца ў лісьце эўрадэпутатаў ад «Групы сяброў Украіны ў Эўрапарламэнце», які зьяўляецца адказам на заявы прэзыдэнта Эстоніі Керсьці Кальюлайд. Яна заявіла, што Ўкраіне трэба яшчэ 20 гадоў, каб далучыцца да ЭЗ.
Эўрадэпутаты адзначылі, што крытэрыі сяброўства ў ЭЗ застаюцца нязьменнымі.
«Новыя чальцы мусяць кіравацца палітычнымі каштоўнасьцямі ЭЗ, прынцыпамі адзінага эканамічнага рынку і адпавядаць юрыдычным пытаньням ЭЗ», — гаворыцца ў лісьце.
Эўрадэпутаты нагадалі, што імкненьне Ўкраіны да сяброўства ў Эўрапейскім зьвязе ў апошнія гады фармуецца Пагадненьнем аб асацыяцыі і Паглыбленым і ўсёабдымным пагадненьнем аб свабодным гандлі.
«Зразумела, што Ўкраіне спачатку давядзецца ў поўнай меры рэалізаваць Пагадненьне аб асацыяцыі, і гэта шлях да ЭЗ. Гэта перш за ўсё працэс рэформаў у многіх сфэрах, і, здаецца, Украіна пагаджаецца, што яны незаменныя», — сказана ў лісьце эўрадэпутатаў.