Прэміі атрымалі журналісткі «Белсату» Кацярына Андрэева і Дар’я Чульцова, журналістка Tut.by Кацярына Барысевіч, журналістка «Нашай нівы» Натальля Лубнеўская, а таксама партал Tut.by і Беларуская асацыяцыя журналістаў.
«Мы прысуджаем усе прэміі беларускім журналістам і мэдыя як знак прызнаньня іхных беспрэцэдэнтных намаганьняў і мужнасьці цягам гэтага драматычнага году, за працу ва ўмовах дыктатуры», — адзначылі арганізатары.
Дар’я Чульцова і Кацярына Андрэева ў гэты момант адбываюць 2-гадовае зьняволеньне ў калёніі за асьвятленьне акцыі памяці Рамана Бандарэнкі. Кацярына Барысевіч ужо выйшла з турмы, на якую яе асудзілі за артыкул з афіцыйнымі мэдычнымі зьвесткамі, якія зьняпраўдзілі словы Лукашэнкі аб тым, што Бандарэнка нібыта быў п’яны. Натальля Лубнеўская вельмі доўга аднаўлялася ад раненьня, якое ёй нанёс адзін зь сілавікоў, стрэліўшы ў калена. Яна была параненая падчас асьвятленьня акцыі пратэсту ў Менску.
ГЛЯДЗІЦЕ ТАКСАМА: Год ад раненьня журналісткі Натальлі Лубнеўскай. Крымінальнай справы на сілавікоў дагэтуль нямаПартал Tut.by сутыкнуўся з магутным ціскам уладаў, якія заблякавалі яго, правялі ператрусы ў рэдакцыі і па месцы жыхарства супрацоўнікаў і зьняволілі шэраг зь іх. БАЖ, у сваю чаргу, таксама перажыла некалькі ператрусаў, рахункі асацыяцыі заблякаваныя.
Прэмія Free Media Awards з 2016 году прысуджалася журналістам з Грузіі, Армэніі, Беларусі, Украіны, Азэрбайджану і Расеі. На яе намінуюць міжнародныя арганізацыі і інстытуты, што дзейнічаюць ва Ўсходняй Эўропе, а таксама экспэрты, якія спэцыялізуюцца на ўсходнеэўрапейскай тэматыцы.
ГЛЯДЗІЦЕ ТАКСАМА: Палітзьняволеная Кацярына Андрэева ў калёніі мела доўгатэрміновае спатканьне з мужам ГЛЯДЗІЦЕ ТАКСАМА: Беларускіх праваабаронцаў узнагародзілі нямецкай прэміяй