2 гады калёніі за напады на «Табакеркі»
У Менскім раённым судзе 2 жніўня да 2 гадоў калёніі агульнага рэжыму асудзілі 53-гадовага лекара, анэстэзіёляга-рэаніматоляга Сьвятаслава Ўдота. У дзяржаўнай сыстэме аховы здароўя ён адпрацаваў 24 гады.
У канцы красавіка мужчыну затрымалі за расклейваньне налепак з фразай «Беларусам — воля, пацуку — падвал» на прыпынку ў Бараўлянах і арыштавалі на 15 дзён. Неўзабаве супраць лекара распачалі крымінальную справу ў ч. 1 і 2 арт. 339 КК (злоснае хуліганства і паўторнае злоснае хуліганства), абвінаваціўшы ў падпале чатырох «Табакерак» і разьбіцьці вакна ў адной з іх.
На судзе мужчына растлумачыў свае дзеяньні тым, што ён як лекар выступае за здаровы лад жыцьця і здаровую нацыю, таму хацеў, каб усе чатыры «Табакеркі», якія ёсьць у Бараўлянах, спынілі працу.
Амаль тры месяцы Сьвятаслава трымалі ў сьледчай турме ў Жодзіне. Прысуд лекару вынесла судзьдзя Анжаліка Казлова, дзяржаўнае абвінавачаньне падтрымлівала памочніца пракурора Менскага раёну Крысьціна Касінская.
ГЛЯДЗІЦЕ ТАКСАМА: Суды і выракі 5 ліпеня: «хімія» за рытарычнае пытаньне чыноўніку, які загадваў фальсыфікаваць выбары ГЛЯДЗІЦЕ ТАКСАМА: Мужчыну затрымалі на памінках па маці і прысудзілі арышт за вокліч «Жыве Беларусь!»