Беларускі бізнэсовец Варабей праз суд прымушае ўкраінскага алігарха вярнуць мільёны даляраў даўгоў. За што?

Раней паведамлялася, што кампанія NT Marine зьвязаная зь беларускім бізнэсоўцам Мікалаем Вараб’ем.

Паводле ўкраінскага англамоўнага выданьня Kyiv Post, у 2019 годзе кампанія NT Marine паставіла 320 тысяч тон вугалю кампаніі Sanderlyn па 78 даляраў за адну тону. Гэты вугаль потым перапрадалі дзяржаўнаму прадпрыемству «Центренерго».

Кіпрская кампанія сплаціла толькі 5 з 25 мільёнаў даляраў, апраўдваючыся тым, што ўкраінскае прадпрыемства не разьлічылася за вугаль.

Украінскае выданьне паведамляе, што ў красавіку паліцыя Ізраілю завяла крымінальную справу аб факце махлярства. Сярод падазраваных — украінскі бізнэсовец Ігар Каламойскі і чацьвёра ягоных партнэраў — Міхаіл Кіпэрман, Марыя Кіпэрман, колішні народны дэпутат Украіны Яўген Гельлер (ён займаўся закупкамі вугалю для «Центренерго») і былы генэральны дырэктар «Прыватбанку» Аляксандар Дубілет.

Мікалай Варабей — беларускі бізнэсовец, уладальнік кампаній «Інтэрсэрвіс» і «Нафтабітумны завод» па аптовым гандлі нафтапрадуктамі, банку «Абсалютбанк» і іншых кампаній. Пасьля прэзыдэнцкіх выбараў яго ўключылі ў пералік асобаў, у дачыненьні да якіх Эўразьвяз, Вялікая Брытанія, ЗША і Канада ўвялі санкцыі за датычнасьць да фальсыфікацыі вынікаў выбараў, здушэньне дэмакратыі і парушэньне правоў чалавека.

Сёлета Ўкраіна нацыяналізавала прадпрыемства «Прикарпатзахідтранс» (Роўна), кантрольны пакет акцый якога належаў Мікалаю Вараб’ю. А супраць ягонага ўкраінскага партнэра Віктара Медзьведчука, які ачольвае партыю «Апазыцыйная плятформа „За жыцьцё“», завялі крымінальную справу за нібыта фінансаваньне тэрарызму. Да таго ж, яго разам з жонкай Аксанай Марчанкай падазраюць у датычнасьці ў 2015 годзе да незаконнай прыватызацыі трубаправоду, што быў ва ўласнасьці кампаніі «Прикарпатзахідтранс».