На літоўскай мяжы за суткі затрымалі яшчэ 72 чалавекі, 49 — на польскай

У папярэдні дзень іх было 53. Ад пачатку году літоўскія памежнікі затрымалі ўжо 1509 мігрантаў, якія нелегальна прыйшлі зь Беларусі.

Гэта ў 18 разоў больш, чым за ўвесь мінулы год.

У большасьці затрыманых няма ніякіх дакумэнтаў. 679 чалавек назваліся грамадзянамі Іраку, 196 — Конга, 114 — Камэруну, 81 — Гвінэі, 68 — Ірану, паведамляе Дзяржаўнае бюро бясьпекі Літвы.

Наплыў мігрантаў зь беларускага боку працягваецца, нягледзячы на тое, што ад 2 ліпеня ў патруляваньні літоўскай мяжы мясцовым памежнікам дапамагаюць афіцэры Эўрапейскага агенцтва памежнай аховы Frontex. Акрамя іх, да памежных зь Беларусьсю ўчасткаў прыкамандзіравалі службовых асобаў іншых падразьдзяленьняў Службы аховы дзяржаўнай мяжы і выдзелілі на ахову пазачарговыя тэхнічныя рэсурсы.

7 ліпеня прэм’ер-міністар Літвы Інгрыда Шыманіце пацьвердзіла намер ураду краіны пабудаваць сьцяну на мяжы зь Беларусьсю. На гэта спатрэбіцца 40 млн эўра.

Мігранты, пераважна азіяцкічя, незаконна пераходзяць і беларускую мяжу з Польшчай. Памежная варта Польшчы за апошнія содні затрымала 49 чалавек, сярод якіх 34 мужчыны, 5 жанчын і 10 дзяцей. Амаль усе былі без дакумэнтаў, 42 чалавекі назваліся грамадзянамі Аўганістану, 7 жыхарамі Расеі.