Ці палохае магілёўцаў няякасная вада на возеры
У сьпіс забароненых месцаў для купаньня 7 гадоў трапляе і самы глыбокі вадаём рэгіёну — Грабянёўскае возера, або, як яго называюць у народзе, Сьвятое. Тут на кабінках для пераапрананьня вывешаныя абвесткі з адпаведным зьместам.
Тыя, з кім удалося пагутарыць, заявілі, што пра забарону купацца ўпершыню чуюць ад журналіста. Некаторыя прызналіся, што ігнаруюць папярэджаньні, бо «сярод знаёмцаў, якія ня першы год ходзяць купацца, няма пацярпелых ад вады з возера». Яны сьцьвярджаюць, што ў выходныя дні пляж повен народу. У будні людзей меней, але большасьць лезе ў ваду.
Абвесткі з забаронай купацца ня ўсе бачаць
Былі суразмоўцы, якія толькі загаралі. Па іхных словах, ратавальнікі пэрыядычна інфармуюць пра забарону купацца і рэкамэндуюць заставацца на пляжы. Але і сярод абачлівых адпачывальнікаў трапляліся тыя, хто не ўтрымаўся, каб не «дакрануцца да вады».
«Я толькі залез па калена, але акунацца ня стаў, — кажа адзін з такіх. — Чуў, што купацца тут нельга, але вада, зразумейце, у сьпёку вабіць. Дзяцей бачыце колькі».
Мужчына дадае, што жыве непадалёк і часьцяком наведвае грабянёўскі пляж. Адзначае, што на ягоных вачах возера забруджвалася, Сёлета вада яшчэ выглядае чыстай, а раней ля берага боўталася арганіка. У тое, што праблему вырашаць, ён ня верыць.
ГЛЯДЗІЦЕ ТАКСАМА: «Cем тыдняў правёў у падвальнай камэры бяз сонечнага сьвятла»,— палітвязень пра ўмовы ў турмеУ Магілёўскім занальным цэнтры гігіены і эпідэміялёгіі кажуць, што ў Грабянёўскім возеры ня выявілі патагенных бактэрыяў, такіх як сальманэла ці шыгела — узбуджальнік дызэнтэрыі, аднак зафіксавана перавышэньне дапушчальнага паказчыка агульнамікробнага забруджаньня. Ігнараваньне рэкамэндацыяў санітарна-эпідэміялягічных службаў можа прывесьці да заражэньня шэрагам небясьпечных інфэкцыяў. У арганізм яны могуць трапіць як праз заглытваньне вады, так і праз пашкоджаньні на скуры, адзначылі ва ўстанове.
Што ня так з возерам
У 2012 годзе возера прызнавалася самым чыстым вадаёмам у горадзе, а праз два гады выдалі прадпісаньне аб забароне купаньня, бо вада не адпавядала стандартам па мікрабіялягічных паказчыках. Тады ж заяўлялася: каб возера выратаваць, трэба пачысьціць дно ад арганічных адкладаў, пласт якіх дайшоў да двух мэтраў. Стан возера называўся крытычным.
Сьвятое возера ў Магілёве
У забруджваньні вады тады вінавацілі птушак, што гняздуюцца на востраве пасярод возера.
Да гарадзкіх уладаў, каб пачысьцілі вадаём, зьвярталіся мясцовыя жыхары. У 2015 годзе сабралі 6500 подпісаў. Пэўнага адказу чыноўнікі тады не далі.
Сёлета ў рэпартажы мясцовай тэлевізіі прычынамі забруджваньня зноў назвалі птушак, дадалі яшчэ замкнёную акваторыю вадаёму, зь якога не выцякае рэчак. Ліквідаваць птушыны востраў, гаварылася ў рэпартажы, браліся ў 2015 годзе, але тады не было грошай.
Птушкі — «прычына» забруджваньня возера — і ўпадабаны імі востраў
Цяпер працы ацэньваюцца ў 100–120 тысяч рублёў. Чыноўнікі абяцаюць у гэтым годзе правесьці абсьледаваньне возера, падрыхтаваць перадпраектную дакумэнтацыю і распрацаваць захады па яго ачыстцы.
Пра само возера
Сьвятое возера — помнік прыроды. Глыбіня сягае 19 мэтраў. Гэта ўлюбёнае месца адпачынку магілёўцаў. На беразе вакол возера шмат бытавога сьмецьця, трапляюцца мёртвыя птушкі.
Ужо некалькі год на возеры жывуць лебедзі. Раней яны прыляталі сюды толькі ўзімку
Упершыню ў гістарычных хроніках возера згадваецца ў 1643 годзе. Паводле жыхароў пасёлку Грабянёва, пяць дзясяткаў гадоў таму возера было невялікае. Калі паблізу пачалі масава будаваць жыльлё, з вадаёму бралі пясок. Возера значна павялічылася як памерамі, гэтак і глыбінёю.
Паводле старажылаў, складаную сыстэму сувязі возера з Дняпром зьнішчылі мэліяратары. З таго часу вада ў ім зрабілася стаячай, чысьціць не спрабавалі. Працы камунальнікаў зводзіліся да парадкаваньня пляжу.
Гэтая публікацыя падрыхтаваная з выкарыстаньнем інфармацыі БелаПАН.