Мінула 72 гадзіны з моманту затрыманьня супрацоўнікаў Tut.by. Які іх статус?

У многіх ужо скончыліся 72 гадзіны з моманту затрыманьня. Але іх не адпусьцілі. На Акрэсьціна Tut.by паведамілі, што як мінімум траіх затрыманых пераводзяць у СІЗА ў Жодзіна. Гэта:

• галоўны рэдактар Марына Золатава
• рэдактар Вольга Лойка
• журналіст Алена Талкачова

Перавод у СІЗА азначае, што яны зьяўляюцца падазраванымі. Мяркуючы па агучанай раней інфармацыі, — па крымінальнай справе аб ухіленьні ад выплаты падаткаў (ч.2 арт.243 КК Беларусі).

Мера стрыманьня ў выглядзе ўзяцьця пад варту абіраецца адразу на 2 месяцы, але на працягу 10 сутак ад моманту затрыманьня падазраванаму павінна быць прад’яўлена абвінавачаньне. Калі яно не прадʼяўлена, мера стрыманьня адмяняецца, гэта значыць, тутбаеўцаў могуць адпусьціць з-пад варты і праз 10 дзён.

Сьледчыя дзеяньні з затрыманымі пачаліся раніцай 18 траўня, пад варту іх узялі ўвечары. Чакаецца, што да канца сёньняшняга дня прававы статус супрацоўнікаў Tut.by і афіліяваных кампаній будзе вызначаны.

Сьпіс затрыманых:

На 21 траўня затрыманыя 15 чалавек:

• галоўная рэдактарка Марына Золатава
• рэдактарка Вольга Лойка
• журналістка Алена Талкачова
• генэральны дырэктар Людміла Чэкіна
• галоўная бухгальтарка Анжэла Асад
• намесьніца дырэктара Ірына Рыбалка
• галоўны інжынэр Ала Лапатка
• юрыстка Кацярына Ткачэнка
• намесьніца галоўнага бухгальтара Марыя Новік
• намесьнік генэральнага дырэктара ў тэхнічных пытаньнях Аляксандар Дайнека
• мэнэджар Андрэй Аўдзееў
• генэральны дырэктар зьвязанай з Tut.by плятформы Hoster.by Сяргей Павалішаў
• дырэктарка RocketData Дар'я Данілава
• былая юрыстка кампаніі Ірына Касьцючэнка
• удава заснавальніка парталу Юрыя Зісера Юлія Чарняўская (пад хатнім арыштам).

Юлія Чарняўская не зьяўляецца ўласьніцай Tut.by, найбольшы пакет акцый кампаніі мае яе дачка Яўгенія.