Як паведамляе сайт брытанскага ўраду, сярод тэмаў дыскусіі кіраўнікоў зьнешнепалітычных ведамстваў — выклікі ад Кітаю, сытуацыя ў Сырыі, Самалі, у заходняй частцы Балканаў і ў М'янме. Міністры замежных справаў абмяркоўваюць, апроч гэтага, дзейнасьць Расеі, у тым ліку нарошчваньне яе войскаў на мяжы з Украінай, зьняволеньне апазыцыйнага дзеяча Аляксея Навальнага, а таксама сытуацыю ў Беларусі. Дэталяў не падаецца.
І ў часе фатаграфаваньня кіраўнікі МЗС G7 трымалі сацыяльную дыстанцыю. Фота АFP
Дзяржсакратар ЗША Энтані Блінкен і кіраўнік МЗС Вялікай Брытаніі Дамінік Рааб яшчэ да пачатку паседжаньня заклікалі краіны G7 аб’яднацца перад выклікам з боку Кітаю, паведамляе Інтэрфакс-Захад.
Іншыя краіны G7 — Канада, Францыя, Нямеччына, Італія і Японія — збольшага падзяляюць асьцярогі Вялікабрытаніі і ЗША наконт Кітаю, хоць некаторыя зь іх маюць іншы падыход да адносін з Пэкінам.
Паколькі цяпер у G7 старшынюе Вялікая Брытанія, пасяджэньні праходзяць у Лёндане.
ГЛЯДЗІЦЕ ТАКСАМА: Чацьвёрты пакет санкцый ЭЗ супраць уладаў Беларусі разгледзяць у чэрвені ГЛЯДЗІЦЕ ТАКСАМА: Уезд у Эўразьвяз могуць дазволіць тым, хто прышчапіўся ўхваленымі вакцынамі