Беларускі грамадзкі і палітычны дзеяч Вацлаў Ластоўскі разам са сваёй жонкай Марыяй Іваноўскай меў дзьвюх дачок — Ганну і Станіславу.
Менская дасьледчыца Алена Кароўчанка знайшла ў літоўскіх архівах пашпарты старэйшай зь іх — Ганны, паведаміў Беларускі дакумэнтацыйны цэнтар.
Ганна-Стэфанія нарадзілася 7 жніўня 1905 году ў вёсцы Парагі Шавельскага (Шаўляйскага) павету. Гэта радзіма яе дзядулі і бабулі па матчынай лініі. Пры атрыманьні свайго першага пашпарта яна пазначыла імя як «Hanka».
Пашпарт старэйшай дачкі Вацлава Ластоўскага — Ганны
Пашпарт старэйшай дачкі Вацлава Ластоўскага — Ганны
Пашпарт старэйшай дачкі Вацлава Ластоўскага — Ганны
У далейшым Ганна Ластаўскайце-Главацкене стала жонкай Піюса Главацкаса, дзеяча Камуністычнай партыі Літвы. Пры атрыманьні пашпарта ў 1927 годзе да дакумэнтаў была прыкладзена заява і паўторная даведка аб хрышчэньні Піюса Главацкаса, а таксама зьвесткі аб месцы іх пражываньня ў Клайпедзе. У адкрытых крыніцах апублікаваны партрэт Ганны аўтарства яе дзеда.
Другі пашпарт старэйшай дачкі Вацлава Ластоўскага — Ганны Ластаўскайце-Главацкене
Піюс Главацкас, дакумэнт аб месцы пражываньня ў Клайпедзе
Некаторыя крыніцы пісалі аб тым, што Ганна можа быць пазашлюбнай дачкой Янкі Купалы, зь якім яе маці пазнаёмілася ў 1907 або 1908 годзе падчас першага прыезду ў Вільню. Аднак дасьледчыца Алена Кароўчанка кажа, што цяпер знойдзены ўсе дакумэнты, якія цалкам абвяргаюць такую вэрсію — Ганна нарадзілася за два гады да знаёмства Марыі Ластоўскай зь Янкам Купалам.
Таксама высьветліліся і падрабязнасьці шлюбу бацькоў Ганны. Выяўляецца, Вацлаў Ластоўскі быў нашмат маладзейшы за Марыю Іваноўскую, зь якой узяў шлюб у Санкт-Пецярбурскай мітрапаліцкай рымска-каталіцкай парафіяльнай царкве Ўнебаўзяцьця Найсьвяцейшай Панны Марыі ў 1904 годзе.
Мэтрыка пецярбургскага касьцёла, якая засьведчыла дакладную дату шлюбу Вацлава Ластоўскага з Марыяй Іваноўскай — 1904 год
«Унікальнасьць знаходак у тым, што ў навуковых працах паказвалася, што год шлюбу — 1903. І нібыта ў аўтабіяграфіі сам Вацлаў напісаў, што ажаніўся ў 1905 годзе. Але запіс з мэтрычнай кнігі касьцёла паказвае, што іх шлюб заключаны 7 студзеня 1904 году. Яшчэ цікавы момант, што нявесту „амаладзілі“ на цэлых 5 гадоў. Марыя Іваноўская 1872 году нараджэньня, гэта значыць, яна старэйшая за Вацлава на цэлых 11 гадоў», — сказала Свабодзе дасьледчыца Алена Кароўчанка.
ГЛЯДЗІЦЕ ТАКСАМА: Падарожжа ў БНР (17). Бунт і раскол у Радзе БНР ГЛЯДЗІЦЕ ТАКСАМА: Выйшла кніга «Нерасстраляныя» пра забітых у 1937 годзе беларускіх літаратараў ГЛЯДЗІЦЕ ТАКСАМА: У Беларусь прывезьлі надмагільную пліту Яна Баршчэўскага, якую сэнсацыйна знайшлі ва Ўкраіне