Сама меней 44 чалавекі загінулі ў цісканіне на габрэйскім рэлігійным фэстывалі ў Ізраілі. Звыш ста людзей атрымалі раненьні. Больш за 20 знаходзяцца ў крытычным або небясьпечным для жыцьця стане.
Прычынаю здарэньня стала паніка, выкліканая тым, што мноства людзей пасьлізнуліся на прыступках.
Інцыдэнт здарыўся позна ўночы 29 красавіка, калі дзясяткі тысяч артадаксальных габрэяў сабраліся на гары Мэрон, каб адсьвяткаваць Лаг-ба-Омэр, габрэйскае сьвята ў гонар Шымона Бар Ёхая, містыка ІІ стагодзьдзя, які там пахаваны.
Гэта быў першы вялікі рэлігійны сход пасьля зьняцьця абмежаваньняў, зьвязаных з пандэміяй.