Беларускі бізнэсовец Зінгман расказаў, што яго дапытвалі супрацоўнікі чатырох спэцслужбаў ДР Конга

Ганаровага консула Зымбабвэ ў Беларусі затрымалі ў Дэмакратычнай Рэспубліцы Конга 19 сакавіка. Разам зь ім затрымалі італьянскага бізнэсоўца Паола Пэрсіка і гендырэктара кампаніі AFTRADE Алега Водчыца, якія прыляцелі адным самалётам зь Зінгманам. Прэс-канфэрэнцыя трансьлявалася зымбабвійскім тэлеканалам Sly Media Tv, паведамляе reform.by.

Зінгман сказаў, што яны сталі «ахвярамі дэзынфармацыі», а паведамленьні ў мэдыя пра тое, дзе іх абвінавачвалі ў датычнасьці да гандлю зброяй і падрыхтоўцы закалоту ў краіне — «поўнай лухтой».

Ён заявіў, што займаецца сельскагаспадарчым і горназдабыўным абсталяваньнем у некалькіх афрыканскіх краінах, і з гэтай мэтай прыехаў у ДР Конга. У краіне ён зьбіраўся сустрэцца і абмеркаваць пастаўкі сельскагаспадарчай тэхнікі для кампаніі мясцовага прадпрымальніка Маісэ Капэндэ, а потым вылецець у Зымбабвэ на наступны дзень. Капэндэ сустракаў у аэрапорце, але яго таксама затрымалі.

Як расказаў Зінгман, на працягу 12 дзён іх дапытвалі прадстаўнікі чатырох спэцслужбаў ДР Конга. Ён сказаў, што за гэты час ня мог ні з кім зьвязацца. Пасьля допытаў і праверак спэцслужбы падрыхтавалі справаздачу, у якой паведамілі пра адсутнасьць прэтэнзій да Зінгмана і іншых, што яны ня маюць дачыненьня да гандлю зброяй і падрыхтоўкі вайскоўцаў.

31 сакавіка ўсіх затрыманых вызвалілі без прад’яўленьня абвінавачаньняў. Яны вылецелі ў Зымбабвэ. Зінгман лічыць, што апэрацыю сплянавалі загадзя, бо артыкулы пра гандаль зброяй зьявіліся ў прэсе адразу пасьля затрыманьня, а ў аэрапорце іх ужо чакалі. Ён дадаў, што ня ведае, хто стаіць за яго затрыманьнем.

Зінгман прызнаў, што падчас папярэдніх паездак ён двойчы сустракаўся з экс-прэзыдэнтам ДР Конга Жозэфам Кабілам на дзьвюх яго фэрмах, але абмяркоўваў пытаньні сельскай гаспадаркі, паколькі Кабіла — адзін з найбуйнейшых фэрмэраў у сваёй краіне.

Таксама Зінгман расказаў пра сваю дзейнасьць як ганаровага консула Зымбабвэ ў Беларусі і візыт прэзыдэнта Зымбабвэ Эмэрсана Мнангагвы ў Менск у 2019 годзе. Падчас гэтай паездкі пастаўкі зброі не абмяркоўваліся.

Па дадзеных беларускіх СМІ, сямʼя Аляксандра Зінгмана кіруе фэшэнэбэльным сталічным рэстаранам Falcone. Сам бізнэсовец быў неаднойчы заўважаны на фота з кіраўніком справамі прэзыдэнта Віктарам Шэйманам падчас ягоных паездак у Афрыку, а таксама з афрыканскімі партнэрамі — у ходзе іх візытаў у Беларусь. Вядома, што Шэйман па даручэньні Лукашэнкі зьяўляецца куратарам супрацоўніцтва з краінамі афрыканскага кантынэнту.

У гэтай сувязі пасьля арышту Зінгмана былі публікацыі, што ён нібыта зьяўляецца «кашальком Аляксандра Лукашэнкі». Але менскі ваенны экспэрт Аляксандар Алесін абвергнуў дадзеную інфармацыю.