Паседжаньне прайшло 31 сакавіка, а 1 красавіка стаў вядомы прысуд — 2900 рублёў штрафу.
Ірыну Цішкоўскую судзяць ужо пяты раз. Чатыры разы яе абвінавацілі ва ўдзеле ў несанкцыянаваных масавых мерапрыемствах (раней — артыкул 23.34, цяпер — 24.23 КаАП). Адзін раз — у абразе прадстаўніка ўлады. Лекарка ўжо атрымала штрафы: 5, 30, 50 і яшчэ раз 50 базавых велічынь.
Гэтым разам да пэдыятра прыйшлі спачатку зь ператрусам. «Перавярнулі ўсю хату. Знайшлі на лядоўні — і вельмі ўзрадаваліся — магніцікі з надпісамі „Вожыкі з народам“ і „Жыве Беларусь“. Магніцікі забралі. Я ім сказала: „Ну цяпер за магніцікі дакладна генэралаў атрымаеце“. Каторы раз забралі бел-чырвона-белы парасон. Знайшлі недашытую мной торбу. Бо яна была ў маіх любімых колерах — белым і чырвоным. Забралі яе. Забралі стужкі — белыя і чырвоныя. Мне калі дораць падарункі, то абвязваюць такімі стужкамі. І ўсё гэта пайшло як рэчавыя доказы», — расказала Свабодзе Ірына Цішкоўская.
ГЛЯДЗІЦЕ ТАКСАМА: «Мае калегі маўчаць». У Жыткавічах пэдыятара з 35-гадовым стажам аштрафавалі за ланцуг салідарнасьці31 сакавіка міліцыя прыйшла да яе на працу. Хоць на прыёме чакалі дзеці з тэмпэратурай, лекарку забралі на апытаньне ў міліцыю, потым — у суд. Але на судзе Ірына Цішкоўская запатрабавала адваката, таму паседжаньне адклалі на 1 красавіка.
Ірына Цішкоўская ў судзе 31 сакавіка
У пратаколе напісана, што жыхарка Жыткавічаў вечарам 20 сакавіка «наўмысна парушыла закон аб масавых мерапрыемствах, што праявілася ва ўзяцьці ёй удзелу ў несанкцыянаваным пікетаваньні без адпаведнага дазволу райвыканкаму з мэтай публічнага выказваньня сваіх грамадзка-палітычных інтарэсаў, падчас якога Цішкоўская разьвесіла на дрэвах стужкі бел-чырвона-белага колеру».
Але гэта ня ўсё. Супрацоўнік міліцыі Дземянчук праводзіў агляд дрэва, аб чым напісаў адпаведны дакумэнт.
«Аб’ектам агляду зьяўляецца ўчастак мясцовасьці 3 на 3 мэтры, які знаходзіцца па вуліцы Сацыялістычнай за 6 мэтраў ад правага боку жылога пяціпавярховага будынку нумар 12а, за чатыры мэтры ад аўтобуснага прыпынку „Школа № 1“ у паўночным кірунку. На ўчастку, які аглядаецца, расьце дэкаратыўнае дрэва каштан пяць мэтраў вышынёю. На гэтым дрэве на адной з галінаў у верхняй частцы дрэва знаходзіцца выраб, які складаецца з трох стужак сынтэтычнага матэрыялу кожная зь якіх даўжынёй 32 сантымэтры, шырынёй — 2,5 сантымэтра, дзьве зь якіх белага колеру, адна — чырвонага. Канец усіх трох стужак зьвязаны ў адзін пучок, з аднаго боку ніткай 25 сантымэтраў, з другога боку ніткі прывязаны болт з разьбой. Плешка балта ўяўляе сабой пяцікутнік шырынёй 1,5 сантымэтра. Даўжыня балта — 2,5 сантымэтра. Гэты выраб быў зьняты з дрэва і ўпакаваны ў цэляфанавы пакет. Агляд скончаны», — апісаў месца правапарушэньня міліцыянт.
«Пасьля міліцыі і суду я вярнулася на працу і сказала бацькам, якія чакалі прыёму з хворымі дзецьмі, каб пачыталі, за што мяне затрымалі. Бо і заўтра прыёму, мусіць, ня будзе. У нас толькі два лекары. Я бацькам прапанавала ісьці на суд, бо гэтая справа тычыцца ня толькі мяне. Хутка будуць на ўсіх складаць пратаколы за тое, што жывём і дыхаем», — сказала лекарка.