Малдова стала першай эўрапейскай краінай, якая бясплатна атрымала вакцыну ад каранавірусу праз адмысловую плятформу COVAX. Пра гэта паведаміла прэзыдэнтка краіны Мая Санду
Кіраўніца дзяржавы асабіста сустрэла ў аэрапорце партыю вакцыны AstraZeneca. 14 400 доз прэпарата прызначаныя для імунізацыі мэдыкаў. Санду спадзяецца, што гэта дапаможа зьнізіць хуткасьць распаўсюджваньня COVID-19.
Праграма COVAX прызначана для забесьпячэньня вакцынай бедных краінаў. Першай бясплатныя прэпараты атрымала Гана.
ГЛЯДЗІЦЕ ТАКСАМА: Усе спадзяваліся на вакцыну ад каранавірусу. Чаму вакцынацыя ідзе так павольнаУ лютым у Малдове зарэгістравалі расейскую вакцыну «Спутник V». Экс-прэзыдэнт Ігар Дадон тады сказаў, што пастаўкі прэпарата ў краіну пачнуцца ў самы бліжэйшы час.
У Малдове пражывае чатыры мільёны чалавек. З пачатку пандэміі ў краіне зафіксавана больш за 190 тысячаў захворваньняў на COVID-19. Памерлі больш за чатыры тысячы пацыентаў.