Урад Ізраіля раіць грамадзянам часова пазьбягаць усіх міжземнаморскіх пляжаў праз маштабны разьліў нафты, піша The Times of Israel.
«Сумесная рэкамэндацыя міністэрстваў аховы здароўя, аховы навакольнага асяродзьдзя і ўнутраных спраў заклікае насельніцтва не наведваць пляжы для купаньня, спорту і адпачынку да наступнага паведамленьня ўладаў», — паведамляе The Times of Israel.
Рэкамэндацыя ахоплівае ўсе пляжы краіны: ад Рош-Ханікры на мяжы зь Лібанам да Зікіму побач з сэктарам Газа.
Разьліў дзясяткаў тон нафтапрадуктаў — адна з найгоршых экалягічных катастроф за гісторыю Ізраіля. Прычына і крыніца разьліву пакуль невядомыя. Па словах міністра навакольнага асяродзьдзя Гілі Гамліэля, на мінулым тыдні разьліў нафты выявілі за 50 км ад узьбярэжжа краіны; уцечка, падобна, адбылася з аднаго з 10 суднаў, якія знаходзіліся ў тым раёне.
У суботу некалькі добраахвотнікаў, якія прыбіралі ўзьбярэжжа, атруціліся таксычнымі выпарэньнямі і трапілі ў шпіталь. Для паскарэньня работ прыцягнулі вайскоўцаў.
ГЛЯДЗІЦЕ ТАКСАМА: Вынікі з Ізраіля пацьвярджаюць эфэктыўнасьць вакцыны Pfizer ГЛЯДЗІЦЕ ТАКСАМА: Больш за 10 тысяч чалавек былі на пахаваньні рабіна родам зь Берасьця, нягледзячы на локдаўн у Ізраілі