СК завёў крымінальную справу за «прымус да страйку» на «Гродна Азоце»

Упершыню Сьледчы камітэт агучыў факты пагрозаў летась 21 жніўня.

«Увечары 20 жніўня на мабільныя тэлефоны кіраўніцтва ААТ „Гродна Азот“ паступілі паведамленьні з пагрозамі забойствам у выпадку няўдзелу ў забастоўцы і непадтрымцы страйкаму», — паведаміў тады Сьледчы камітэт у сваім тэлеграм-канале.

Паводле інфармацыі СК, аднолькавыя паведамленьні атрымалі 6 супрацоўнікаў прадпрыемства ў Viber. У паведамленьні згадваліся таксама імёны дзяцей гэтых супрацоўнікаў.

«У сувязі з тым, што грамадзяне ўспрымалі гэтую пагрозу рэальна, непакоіліся за сябе, а таксама за жыцьцё і здароўе сваіх дзяцей, яны напісалі заявы ў Сьледчы камітэт», — гаварылася ў афіцыйным паведамленьні.

Сёлета 19 лютага Сьледчы камітэт заявіў, што распачаў крымінальную справу па гэтых фактах паводлк артыкулу 200 Крымінальнага кодэксу (прымус да страйку). Санкцыі артыкулу прадугледжваюць пакараньне да 3 гадоў пазбаўленьня волі. Сьледчыя дапытваюць сьведак у межах гэтай крымінальнай справы, праводзяць іншыя сьледчыя і працэсуальныя дзеяньні.

Вядома пра чатырох былых або актуальных супрацоўнікаў «Гродна Азот», якіх выклікалі на допыт. Хто падазраваны ў гэтай справе, пакуль невядома.

Лідэр страйкаму «Азоту» Юры Рававы расказаў, што ведаў аб праверцы гэтых фактаў яшчэ ў жніўні. 21 жніўня да яго ў інтэрнат прыйшлі невядомыя людзі ў цывільным, аднак тады паплечнікі дапамаглі Рававому выйсьці з жытла бясьпечна і схавацца. Неўзабаве ён выехаў у Варшаву, дзе застаецца дагэтуль.

Позва Юрыю Рававому з СК

• Рабочыя «Гродна Азот» аднымі зь першых заявілі пра намер паступова спыніць вытворчасьць і пачаць страйк.
• Яны агучвалі агульнанацыянальныя патрабаваньні: спыніць гвалт і зладзіць новыя выбары.
• 13 жніўня калёна з прыкладна тысячы азотаўцаў прайшла па горадзе ў цэнтар гораду і далучылася да вялікага пратэставага маршу.
• Пазьней да работнікаў прыяжджала кіраўніцтва гораду на чале са старшынём райвыканкаму Мечыславам Гоем і сілавых структураў, каб угаварыць іх не страйкаваць.

1 лютага ў Жлобіне асудзілі трох работнікаў БМЗ за спробу страйку, далі 2,5 і 3 гады калёніі.