Павал Латушка: «На ўсе ролі ў Купалаўскі тэатар цяпер набіраюць студэнтаў»

Старшыня Народнага антыкрызіснага кіраўніцтва Павал Латушка ў інтэрвію польскай газэце Rzeczpospolita расказаў аб масавых рэпрэсіях у беларускай культуры.

Ён згадаў, што пасьля страйкаў і акцый салідарнасьці з Нацыянальнага тэатру імя Янкі Купалы сышлі больш за 60 чалавек. Хваля звальненьняў таксама захліснула Вялікі тэатар опэры і балету, Новы драматычны тэатар і іншыя.

«Рэжым Лукашэнкі доўгія гады змагаецца зь беларускай культурай. Самасьвядомасьць, павага да гістарычных і культурных каштоўнасьцяў, нацыянальных традыцый — усё гэта не пра Лукашэнку. Ён прымушае буйны бізнэс укладацца ў лядовыя палацы, а не ў культуру, як ва ўсім цывілізаваным сьвеце».

Тысячы работнікаў культуры, артыстаў, музыкаў, мастакоў і рэжысэраў падпісалі адкрыты ліст з патрабаваньнем спыніць гвалт і правесьці новыя сумленныя выбары. Сярод іх і тыя, хто быў у добрых стасунках з Лукашэнкам.

«Кожны разумны артыст разумее, што зьвязацца цяпер з Лукашэнкам — гэта назаўжды зганьбіць сябе».

Латушка лічыць, што беларускі народ мае права не забываць тых, хто падтрымлівае рэжым, і гэта адаб’ецца на іх «запатрабаванасьці ў будучыні».

Таксама Латушка расказаў пра сёньняшні дзень Купалаўскага тэатру, які ўзначальваў да свайго звальненьня.

«На ўсе ролі ў тэатар цяпер набіраюць студэнтаў, і гэта вялікая памылка. Ня маю нічога супраць таго, каб моладзь разьвівалася, але Купалаўскі — культавае месца для Беларусі. Там павінны выступаць і працаваць найлепшыя».

На прыкладзе Купалаўскага тэатру Латушка заяўляе, што Лукашэнку лёгка разбурыць культавае месца. Што тады казаць пра іншыя тэатры і артыстаў, якія «не пасьпелі стаць вядомымі». Цяпер некаторыя артысты разглядаюць магчымасьць супрацоўніцтва з тэатрамі іншых краін.