14 ліпеня, калі не зарэгістравалі кандыдатамі ў прэзыдэнты Віктара Бабарыку і Валера Цапкалу, Яўген Каліноўскі браў удзел у акцыі пратэсту і спрабаваў перашкодзіць затрыманьням.
16 студзеня суд Першамайскага раёну адправіў яго ў калёнію агульнага рэжыму на 4 гады, паведаміла «Вясна».
Судзьдзя Максім Трусевіч прызнаў хлопца вінаватым па ч. 1 арт. 342 і арт. 364 Крымінальнага кодэксу. Ён таксама пастанавіў заплаціць пацярпелым амапаўцам: Ігару Астапуку — 1000 рублёў, Алегу Баразнову — 1500 рублёў.
Яўген Каліноўскі сваёй віны не прызнаў. Ён лічыць, што спрабаваў спыніць супрацьпраўныя дзеяньні апамаўцаў.
«У сваім жыцьці і ў прыватнасьці ў абставінах, якія абмяркоўваюцца цяпер, заўсёды кіраваўся маральнымі каштоўнасьцямі, якія ўклалі ў мяне бацькі, добрае выхаваньне, школы, ВНУ», — казаў ён на судзе.
«Мне шкада, што сытуацыя склалася такім чынам, што меліся факты фізычнага кантакту з супрацоўнікамі міліцыі, аднак хачу падкрэсьліць, што яны былі абумоўленыя ў першую чаргу ўзьдзеяньнем супрацоўнікаў міліцыі на асобаў, якія знаходзіліся там, што маральна і этычна асуджалася грамадзтвам і Рэспублікі Беларусь, і міжнароднай супольнасьцю. І была дадзеная адназначная грамадзкая ацэнка. І я ў прынцыпе згодны з гэтай ацэнкай і па гэтай прычыне дзейнічаў у названых абставінах так, як яно атрымалася».
Яўген Каліноўскі плянуе абскардзіць прысуд.
ГЛЯДЗІЦЕ ТАКСАМА: Менчука асудзілі на тры гады калёніі за напад на амапаўца 14 ліпеня ГЛЯДЗІЦЕ ТАКСАМА: Менчука, які адбіваў пратэстоўца ад апамаўцаў, асудзілі на 4 гады зьняволеньня ГЛЯДЗІЦЕ ТАКСАМА: Вынесьлі прысуд удзельніку першай сутычкі з АМАПам падчас выбарчай кампаніі ГЛЯДЗІЦЕ ТАКСАМА: Тры гады калёніі — чарговы прысуд за пратэсты ў дзень адмовы ў рэгістрацыі Бабарыкі