Два беларускія экіпажы фінішавалі на лідэрскіх пазыцыях у пралёгу прэстыжнай гонкі «Дакар-2021».
Аўтагоншчык Сяргей Вязовіч на «МАЗе» стаў найлепшым у заліку грузавікоў. Другое месца з адставаньнем у 1 сэкунду таксама заняў экіпаж беларуса Аляксея Вішнеўскага. Трэцім фінішаваў экіпаж Марціна Маціка з каманды Big Shock Racing.
Па выніках 11-кілямэтровага пралёгу вызначыўся парадак старту на першым спэцучастку. Асноўная частка шматдзёнкі «Дакар» стартуе 3 студзеня.
ГЛЯДЗІЦЕ ТАКСАМА: Беларускі МАЗ упершыню выйграў этап ралі-рэйду «Дакар»Сёлета «Дакар» пройдзе ў Саудаўскай Арабіі. Удзельнікі маратону за 12 этапаў пераадолеюць агулам 7776 кілямэтраў, зь іх 4767 — гэта спэцучасткі на час праходжаньня.
Спачатку плянавалася, што ралі ахопіць некалькі краін, аднак праз пандэмію каранавірусу было вырашана абмежавацца Саудаўскай Арабіяй.