Кастрычніцкі раённы суд у Санкт-Пецярбургу прысудзіў гісторыку Алегу Сакалову 12 з паловай гадоў калёніі строгага рэжыму. Былога дацэнта Санкт-Пецярбурскага дзяржаўнага ўнівэрсытэту прызналі вінаватым у забойстве асьпіранткі і сужыцелькі Анастасіі Ешчанкі, а таксама ў незаконным захоўваньні зброі.
Раней пракуратура запрошвала для Сакалова 15 гадоў пазбаўленьня волі, абарона гісторыка настойвала прызначыць яму ня больш за 8 гадоў.
ГЛЯДЗІЦЕ ТАКСАМА: Пецярбурскі гісторык, абвінавачаны ў жорсткім забойстве студэнткі, рэгулярна бываў у БарысавеЗабойства 24-гадовай Анастасіі Ешчанкі адбылося ў ноч на 8 лістапада летась у кватэры Сакалова ў цэнтры Пецярбургу. Раніцай гісторык быў знойдзены ў рацэ Мойцы разам з заплечнікам, у якім былі адсечаныя рукі загінулай дзяўчыны. Падчас ператрусу ў кватэры дацэнта былі знойдзеныя іншыя фрагмэнты цела Ешчанкі. Пазьней Сакалоў прызнаўся ў забойстве. Кіраўніцтва ўнівэрсытэту звольніла яго.
ГЛЯДЗІЦЕ ТАКСАМА: Дамаганьні, каханьне, улада. Чаму брутальнае забойства студэнткі расейскім гісторыкам важнае для Беларусі- Падчас судовага працэсу Сакалоў прызнаў віну толькі часткова, паколькі ён лічыць свае дзеяньні ненаўмыснымі і ўчыненымі «ў стане поўнага ашаламленьня, які надыходзіў пасьля істэрык Ешчанкі». У студзені па выніках псыхоляга-псыхіятрычнай экспэртызы абвінавачаны ў забойстве быў прызнаны ў стане прытомнасьці.
- У лістападзе летась кіраўнік Сьледчага камітэту Расеі Аляксандар Бастрыкін даручыў пецярбурскай управе ведамства праверыць інфармацыю пра іншыя магчымыя злачынствы Сакалова. Да забойства Ешчанкі яго абвінавачвалі ў гвалце над яшчэ адной дзяўчынай, у патапленьне судна і правакаваньні бойкі на лекцыі.