Дэпутат Нацыянальнай асамблеі Францыі Фрэдэрык Пэці выступіў з артыкулам «Ня будзем забываць Беларусь».
ГЛЯДЗІЦЕ ТАКСАМА: Тысячы людзей выйшлі на акцыі памяці забітага Рамана Бандарэнкі ў Менску і іншых гарадах. Больш за 1000 затрыманых. ФОТА і ВІДЭА
Францускі палітык зьвяртае ўвагу на тое, што пратэсты ў Беларусі маюць ня столькі палітычны, колькі нацыянальны характар.
«Сто дзён таму, піша дэпутат, беларускі народ выступіў супраць грубай фальсыфікацыі вынікаў прэзыдэнцкіх выбараў. З тых часоў ён змагаецца з рэжымам, які хлусіць яму, пагражае яму, б’е яго, саджае ў турму і катуе яго.
Праз сто дзён беларусы нагадалі, што яны існуюць, і перш за ўсё самім сабе. Як выдатна заявіла ў жніўні Сьвятлана Алексіевіч, ляўрэат Нобэлеўскай прэміі па літаратуры: «Дэманстранты вяртаюць нам годнасьць нашай нацыі».
ГЛЯДЗІЦЕ ТАКСАМА: «Прымусілі прысесьці 400 разоў». Як абыходзяцца зь вядомымі спартоўцамі ў ІЧУ
Фрэдэрык Пэці лічыць, што народны рух у Беларусі нясе ў сабе пытаньне беларукай ідэнтычнасьці і вяртаецца да вытокаў гісторыі: «Хто мы, беларусы, у ХХІ стагодзьдзі?»,
Гэта, на думку францускага дэпутата, сымбалізуе выкарыстаньне дэманстрантамі старога бел-чырвона-белага сьцяга і гербу Пагоня, якімі яны ганарацца. Беларусы ўспамінаюць пра сваю адвагу ў гісторыі і гэта дапамагае ім процістаяць гвалту рэжыму: 6 забітых, 500 катаваных, 17 000 затрыманых. Таму беларусы выходзяць на вуліцы кожную нядзелю ў Менску і іншых гарадах краіны.
Таксама францускі дэпутат піша пра міжнароднае значэньне беларускіх пратэстаў:
«За сто дзён беларусы нарэшце нагадалі сваім суседзям у Эўразьвязе, што яны існуюць. Члены Каардынацыйнай рады ў выгнаньні сустракаюцца з эўрапейскімі лідэрамі, паступова выбудоўваюць дыпляматычныя кантакты, каб падрыхтаваць пераход, які раней ці пазьней адбудзецца. Такім чынам, яны надаюць новы сэнс і актуальнасьць таму, што Эўрапейскі зьвяз называе палітыкай суседзтва».
ГЛЯДЗІЦЕ ТАКСАМА: Прэзыдэнт Францыі Макрон выказаўся ў Вільні пра мірны пераход улады ў Беларусі
Напрыканцы артыкулу Фрэдэрык Пэці заклікае ўзмацніць санкцыі супраць рэжыму Лукашэнкі.
«На соты дзень, пасьля недвухсэнсоўнага асуджэньня рэжыму, мы павінны выйсьці за рамкі асобных індывідуальных санкцый і больш рашуча падтрымаць нашых суседзяў: прызнаньню і абароне апазыцыі, абменам, напрыклад, візы для сем’яў для выгнанцаў і студэнтаў, а таксама фармаваньню грамадзянскай супольнасьці.
Праз сто дзён беларусы нагадалі нам, што яны існуюць. Зімовыя халады, кавід, стомленасьць пачынаюць уплываць на іх, але давайце больш ня будзем іх забываць».