Брат Мікіты Крыўцова Павал Кухта, які зьехаў зь Беларусі ў 2016 годзе, каб змагацца за незалежнасьць Украіны ў шэрагах добраахвотніцкага батальёну, заклікаў беларусаў ня верыць у афіцыйную вэрсію гібелі свайго брата і не спыняць далейшай барацьбы за вольную краіну.
Свой зварот ён распаўсюдзіў у сацыяльных сетках:
«Зараз я не магу вярнуцца на радзіму. Майго брата па-зьверску забілі. Сьледчы камітэт сьцьвярджае, што ён зрабіў самагубства — нібыта з прычыны разводу з жонкай. Гэта абсалютная хлусьня. Я ведаю брата, ён вельмі моцна любіў сваю сям’ю і хаця б дзеля іх гэтага не зрабіў бы. Я цудоўна памятаю нашу апошнюю сустрэчу — ягоныя вочы, поўныя радасьці і шчырасьці, калі ён расказваў пра свае жыцьцёвыя гісторыі і асабліва пра сваю дачку. Вэрсія пра самагубства — гэта плявок ня толькі ў бок нашай сям’і, але і ўсяго беларускага народу.
Я ня ведаю ўсіх абставінаў, але я абсалютна дакладна перакананы, што мой брат трапіў у рукі карнікаў. Азьвярэлыя забойцы не змаглі зламаць ягонай волі і проста забілі яго да сьмерці. Цяпер мне вельмі важна, каб імёны як майго брата, так і ўсіх іншых загінулых увайшлі як героі ў гісторыю новай Беларусі.
Ягоная сьмерць не павінна быць беспакаранай, але яшчэ больш важна, каб ён ня быў забыты і каб такое больш ніколі не паўтарылася.
ГЛЯДЗІЦЕ ТАКСАМА: «Бацьку цяжка было на гэта глядзець». Сямʼі Мікіты Крыўцова аддалі цела сына для пахаваньняБеларусь не павінна застацца краінай зь сярэднявечнай дыктатурай, дзе чалавека могуць схапіць, забіць, а цела выкінуць у лес. Беларусь, краіна ў цэнтры Эўропы, заслугоўвае лепшага, і сам народ гэта неаднаразова даказваў.
Увесь сьвет бачыць, што за два тыдні шматтысячных пратэстаў абсалютна нічога не разьбілі і не пабілі. З кожным выхадам людзей на вуліцу ўлада спрабуе ачарніць культурных і прыстойных беларусаў. Разам тым прыхільнікаў Свабоднай Беларусі становіцца ўсё больш.
У нашай краіне няма праваахоўных органаў, якія б абаранялі народ. Таму я хачу папрасіць вас, свабодныя беларусы. Абараняйце сябе і сваіх блізкіх, змагайцеся і памятайце: пакуль духам не ўпадзеш, сілай ня возьмуць.
Жыве Беларусь!»
ГЛЯДЗІЦЕ ТАКСАМА: Павешаны Мікіта Крыўцоў хадзіў на мітынг, ёсьць відэа. Сьледчы камітэт: яго не затрымлівалі ГЛЯДЗІЦЕ ТАКСАМА: «Любіў жыцьцё і меў вялікія пляны». Жонка Мікіты Крыўцова ня верыць, што ён скончыў жыцьцё самагубствам ГЛЯДЗІЦЕ ТАКСАМА: Сотні чалавек прыйшлі разьвітацца зь Мікітам Крыўцовым. ФОТА, ВІДЭА