Вядомы беларускі пісьменнік Уладзімір Арлоў, які прыйшоў да Сьледчага камітэту падтрымаць сябра прэзыдыюму Каардынацыйнай рады Сьвятлану Алексіевіч, ня выключыў, што нобэлеўская ляўрэатка можа ня выйсьці зь ведамства.
Сам факт выкліку на допыт чалавека такога статусу сьведчыць пра «маральную нізасьць» беларускай улады, падкрэсьлівае ён.
Уладзімер Арлоў
«З часоў Гітлера і Сталіна Беларусь ніколі яшчэ не перажывала такіх зьдзекаў з чалавечай і нацыянальнай годнасьці. Зьдзек з права і маральных законаў. Сёньня мы бачым прыклад стаўленьня Лукашэнкі да беларускай культуры. На допыт выклікалі нобэлеўскую ляўрэатку Сьвятлану Алексіевіч. У іншых краінах улада раілася б з нобэлеўскім ляўрэатам. З чалавекам, шырока вядомым ва ўсім сьвеце. А ў нас яго выклікаюць на допыт. І мы ня ведаем, ці вернецца яна адтуль. Недапушчальна, што такое адбываецца ў краіне», — падсумаваў літаратар.
Сьвятлана Алексіевіч атрымала позву ў Сьледчы камітэт як сьведка ў крымінальнай справе, распачатай Генпракуратурай за арганізацыю і дзейнасьць Каардынацыйнага камітэту.
ГЛЯДЗІЦЕ ТАКСАМА: Латушка пасьля допыту ў Сьледчым камітэце заявіў, што дзейнасьць Каардынацыйнай рады працягнеццаРаней былі дапытаныя сябры прэзыдыюму Максім Знак, Лілія Ўласава і Павал Латушка. Вольгу Кавалькову і Сяргея Дылеўскага асудзілі на 10 дзён адміністрацыйнага арышту кожнага.