У краму «Адметнасьць» 24 жніўня прыйшлі супрацоўнікі фінансавай міліцыі зь ператрусам. Яны патлумачылі, што ўласьнік крамы сябра БХД Сяргей Верамеенка праходзіць сьведкам у крымінальнай справе аб арганізацыі беспарадкаў.
Ператрус ішоў 2,5 гадзіны. Ім кіраваў намесьнік начальніка Слонімскага аддзяленьня дэпартамэнту фінансавых расьсьледаваньняў. Напачатку ён доўга ня мог патлумачыць, што менавіта будуць шукаць. Верамеенка не хацеў пускаць міліцыянтаў усярэдзіну, пакуль тыя не пакажуць дакумэнты на ператрус. У пэўны момант міліцыянт моцна штурхануў дзьверы крамы і фактычна ўварваўся ў яе, пры гэтым пашкодзіў уласьніку крамы пальцы на назе.
Сяргей Верамеенка, архіўнае фота
У выніку з крамы забралі 27 вялікіх бел-чырвона-белых сьцягоў з тканіны, больш як 40 маленькіх нацыянальных сьцяжкоў, больш як 40 скураных бранзалетаў з выявай бел-чырвона-белага сьцяга. Да таго ж забралі паперы з інфармацыяй пра вынікі галасаваньня на пэўных выбарчых участках Горадні і «Дэклярацыю аб выхадзе з палітычнага крызісу».
Так выглядала крама да ператрусу
Верамеенку выклікалі ў Сьледчы камітэт як сьведку ў справе аб арганізацыі або падрыхтоўцы дзеяньняў, якія груба парушаюць грамадзкі парадак (ч. 1 арт. 342 Крымінальнага кодэксу Беларусі).
ГЛЯДЗІЦЕ ТАКСАМА: «Даніловіч хлусіць». Гісторыкі адказалі кіраўніку Інстытуту гісторыі наконт сьцяга ГЛЯДЗІЦЕ ТАКСАМА: Як Лукашэнка, сам таго ня хочучы, вярнуў нацыянальную сымболіку ГЛЯДЗІЦЕ ТАКСАМА: 17-ы дзень пратэстаў. Разьвітаньне зь Мікітам Крыўцовым, 29 гадоў аднаўленьня незалежнасьці