Генэральны дырэктар менскага электратэхнічнага заводу імя Казлова разам з заводзкім прафкамам рыхтуюць заяву аб незаконных затрыманьнях пратэстоўцаў і адключэньні інтэрнэту, перадае карэспандэнт Свабоды.
Пра гэта паведаміў намесьнік дырэктара заводу Валеры Шчэрба — прафкам і генэральны дырэктар падтрымалі ініцыятыву актыву заводу.
Каля заводу сабраліся два дзясяткі людзей, якія хочуць падтрымаць рабочых. На вачах карэспандэнта Свабоды міліцыя затрымала кіроўцу адной з машынаў. Людзі спрабавалі спусьціць колы ў міліцэйскай машыны, ударылі па ёй, але не змаглі спыніць затрыманьня. Раней па горадзе прайшла калёна з прыблізна сотні чалавек, якія хацелі падтрымаць заводзкіх.
Каля 14.30 да заводу прыехаў АМАП і затрымаў каля 10 чалавек, якія выказвалі салідарнасьць рабочым ля ўваходу.
А 17-й гадзіне ля заводу засталіся міліцыя і АМАП, правярае дакумэнты людзей, якія туды прыходзяць. Рабочы сказаў Свабодзе, што бачыў затрыманьне каля заводу і зусім нядаўна.
ГЛЯДЗІЦЕ ТАКСАМА: Прэс-сакратарка Ціханоўскай: Мы за ўсе мірныя сродкі барацьбы, уключна з страйкамі ГЛЯДЗІЦЕ ТАКСАМА: На менскім заводзе Казлова выйшлі на пратэст. Сьведка: «Такога не было з савецкіх часоў» ГЛЯДЗІЦЕ ТАКСАМА: Кандыдат у прэзыдэнты ЗША Байдэн: «Народ Беларусі патрабуе, каб яго голас пачулі»Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.