Экс-прэтэндэнт на пасаду прэзыдэнта Беларусі Валер Цапкала 7 жніўня прыляцеў у Варшаву, паведаміў агенцтву «Інтэрфакс» прадстаўнік ягонага штабу Аляксей Урбан.
«Валер Цапкала раніцай прызямліўся ў Варшаве, у аэрапорце яго здымае Нацыянальная польскач тэлевізія. Заплянаваныя сустрэчы што да сытуацыі ў Беларусі зь вядомымі польскімі і эўрапейскімі палітыкамі», — адзначыў Аляксей Урбан.
ГЛЯДЗІЦЕ ТАКСАМА: «Гэта правіла беларускай палітычнай гігіены». Ганна Севярынец просіць Цапкалу адмовіцца ад зваротаў да Пуціна24 ліпеня праз асьцярогу быць затрыманым Валер Цапкала пакінуў Беларусь і зьехаў у Маскву разам зь дзецьмі. Ягоная жонка Вераніка засталася ў Беларусі і працягнула працу ў аб’яднаным штабе кандыдаткі ў прэзыдэнты Сьвятланы Ціханоўскай.
Пазьней Цапкала заявіў, што зьбіраецца даць сэрыю прэс-канфэрэнцый аб перадвыбарнай сытуацыі ў Беларусі ва Ўкраіне, краінах Эўразьвязу і ЗША.
ГЛЯДЗІЦЕ ТАКСАМА: Ціханоўскую забудуць, Бабарыку пасадзяць, Цапкала ня вернецца — прагнозы ад экс-намесьніка кіраўніка адміністрацыі ЛукашэнкіЦэнтарвыбаркам Беларусі 14 ліпеня не зарэгістраваў Цапкалу кандыдатам у прэзыдэнты празь нібыта недахоп неабходных 100 тысяч подпісаў. Ягоная ініцыятыўная група сабрала больш за 200 тысяч, у выбаркамы здалі 160 тысяч. Аднак ЦВК прызнаў сапраўднымі менш за 80 тысяч подпісаў.
Вярхоўны суд адхіліў скаргу прэтэндэнта.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.