Валер Цапкала 4 жніўня перад інтэрвію беларускай службе Радыё Свабода, даў вялікае інтэрвію ўкраінскай службе. Гутарка адбывалася ў бюро Свабоды ў Кіеве, дзе ён цяпер знаходзіцца.
Пра Лукашэнку
«Для яго ўлада — самамэта. На фоне нашых суседзяў, на фоне іншых краін мы дэманструем мінус у разьвіцьці. Ніхто з людзей не верыць, што заўтрашні дзень будзе лепшым за сёньняшні».
Пра далейшы маршрут
З Беларусі Валерый Цапкала паехаў у Расею, цяпер ён хоча наведаць Варшаву і краіны Балтыі.
«Найбольш выбары выклікаюць цікавасьць у суседзяў. Таму пляную паехаць сьпярша ў Варшаву», — сказаў Валерый Цапкала.
ГЛЯДЗІЦЕ ТАКСАМА: «Ціханоўская — беларуская Жанна д'Арк». Цапкала пра сябе і выбарчую кампанію. Інтэрвію для Свабоды з Кіева. ВІДЭАПра «фанэрных марыянэтак»
Падчас пасланьня Аляксандар Лукашэнка назваў аб’яднаны штаб Сьвятланы Ціханоўскай «кардоннымі марыянэткамі» і абвінаваціў іх у несамастойнасьці.
«За аб’яднаным штабам стаіць беларускі народ. У Лукашэнкі заўжды нехта стаіць за апазыцыяй, то гэта Крэмль, то экспарт Майдану з Украіны, то камісары ЭЗ. Пра „лялькаводаў“ мы наслухаліся. Калі жанчын нехта выкарыстоўвае, то чаму ён іншых не зарэгістраваў. Усім зразумела, што Ярмошына яго падзельніца».
Пра «вагнэраўцаў»
«Яны маглі зьняць кватэру, але прыехалі ў санаторый прафсаюзнай гасьцініцы. Яны там спыніліся і адпачывалі, адзінае — гарэлку не пілі. Мы настолькі звыкліся да яго хлусьні, што не рэагуем на яе».
На думку Валерыя Цапкалы, ніхто «затрыманых не будзе выдаваць Украіне».
ГЛЯДЗІЦЕ ТАКСАМА: Турэцкі бізнэсовец кажа, што падаў заяву ў Генпракуратуру на Вераніку Цапкалу і яе сястру
Пра пагрозу анэксіі
«Тое, што Расея цяпер віноўніца ўсіх бедаў для Лукашэнкі — гэта для ўсіх сьмешна. У яго пастаянна мусіць быць зьнешні вораг».
Адказваючы на пытаньні, Цапкала канкрэтна не адказаў, чый Крым і якой пазыцыі ён прытрымліваецца ў канфлікце на Ўсходзе Ўкраіны. Валерый Цапкала патлумачыў, што «няма простага адказу на гэтыя пытаньні». Пра беларускую мову
«Трэба запускаць ток-шоў на беларускай мове, праграмы на беларускай мове. У нас цяпер, у прынцыпе, няма ток-шоў. У нас праграмы паказваюць аднаго чалавека».
ГЛЯДЗІЦЕ ТАКСАМА: Цапкала адрасаваў заклік падтрымаць свабодныя выбары ў Беларусі кіраўнікам 32 краінаў, але не РасеіПрэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.